«Республикада ғилдиракли транспорт воситаларининг экологик тоифа талабларига мувофиқлигини баҳолаш тизимини янада такомиллаштириш чора-тадбирлари тўғрисида»ги ҳукумат қарори қабул қилинди.

Қарорга кўра, Ўзбекистонга олиб кириладиган M ва N тоифалардаги ғилдиракли янги транспорт воситаларининг экологик тоифа талабларига мувофиқлигини экологик сертификатлаш тартиби бекор қилинади.

Ўзбекистонга олиб кириладиган M ва N тоифалардаги ғилдиракли транспорт воситаларининг экологик тоифа талабларига мувофиқлиги Вазирлар Маҳкамасининг 2017 йил 25 апрелдаги 237-сон қарори билан тасдиқланган Муомалага чиқарилаётган ғилдиракли транспорт воситаларининг хавфсизлиги тўғрисидаги умумий техник регламент талаблари асосида баҳоланади ҳамда транспорт воситасининг турини маъқуллаш ва мувофиқлик сертификатларида акс эттирилади.

Электр двигателлар билан жиҳозланган ғилдиракли транспорт воситаларининг (ички ёнув двигатели ҳамда электр двигателда ҳаракатланувчи автотранспорт воситалари бундан мустасно) экологик тоифа талабларига мувофиқлиги баҳоланмайди.

M тоифаси — йўловчи ташиш учун мўлжалланган ғилдиракли транспорт воситалари:

• M1 — 8 йўловчигача (хайдовчидан ташқари) олиб юрадиган енгил автомобиллар;
• M2 — 8 йўловчидан ортиқ, лекин умумий оғирлиги 5 тоннадан ошмайдиган автобуслар;
• M3 — 8 йўловчидан ортиқ ва умумий оғирлиги 5 тоннадан ортиқ автобуслар.

N тоифаси — юк ташиш учун мўлжалланган ғилдиракли транспорт воситалари:

• N1 — 3,5 тоннадан ошмайдиган юк автомобиллари;
• N2 — 3,5 тоннадан ортиқ, лекин 12 тоннадан ошмайдиган юк автомобиллари;
• N3 — 12 тоннадан ортиқ юк автомобиллари.

Аввалроқ, Ўзбекистонда 2 сентябрдан автомобилларни Пискент синов мажмуасида синовлардан ўтказиш амалиёти тўхтатилганди. Бунга республикада расмий дилерлар ва сервис марказлари сони кескин ошгани ҳамда истеъмолчиларнинг расмий дилерлар билан ишлаш амалиёти жорий этилгани сабаб сифатида келтирилган.

Эслатиб ўтамиз, 2024 йил 1 ноябрдан бошлаб Техник жиҳатдан тартибга солиш агентлиги импорт қилинган автомобилларни техник кўрикдан ўтказиш тартибини ўзгартирганди. Тартибга кўра, хориждан олиб кириладиган транспорт воситалари божхона ҳудудида эмас, балки Тошкент вилоятининг Пискент туманидаги автомобиль полигонида синовдан ўтказилиши белгиланганди.