Иккинчи чоракда меҳнат муҳожирлари томонидан Ўзбекистонга жами 4,8 млрд доллар миқдорида пул ўтказмалари амалга оширилди, дея хабар қилмоқда Марказий банк ўзининг иккинчи чорак бўйича меҳнат бозори шарҳида.

Апрель июнь ойларида пул ўтказмалари ўтган йилнинг мос даврига нисбатан 21,4 фоизга ўсди. 2024 йилнинг мос даврида 38,6 фоизлик ўсиш кузатилгани ҳисобга олинса, ҳисобот даврида пул ўтказмалари ўсиш суръати (биринчи чорак билан солиштирганда ҳам) нисбатан секинлашган.

Айни пайтда, пул ўтказмаларининг ҳажман ўсиши асосан меҳнат муҳожирларини қабул қилувчи мамлакатларда валюта курсларининг нисбатан барқарорлиги, иш ҳақининг ошиши ва иқтисодий фаолликнинг юқори суръатлари билан изоҳланмоқда.

Иккинчи чоракда турли минтақалардан жўнатилган пул ўтказмалари ўсиш суръатининг сезиларли ўзгариши кузатилган. Хусусан, Болтиқ давлатлари (ўтган йилнинг мос даврига нисбатан 65,6 фоиз) ва бошқа минтақалардан (38,2 фоиз) ўтказмалар ҳажмининг жадал ўсиши, шу билан бирга, қолган минтақаларга нисбатан юқорироқ ўсиш суръатлари кузатилмоқда.

Ҳисобот даврида Европадан пул ўтказмалари ҳажмининг ўсиш суръати (26,9 фоиз) АҚШ, Россия ва Осиёга нисбатан юқорироқ шаклланганига қарамай, иккинчи чоракда сезиларли секинлашиш тенденциясини намоён қилган. АҚШ ва Россиядан пул ўтказмалари ўсиши секинлашган (мос равишда 10,3 фоиз ва 23,7 фоиз). Осиёдан ўтказмаларнинг барқарор тенденцияси сақланиб қолган.

Жорий динамиканинг шаклланиши меҳнат муҳожирлари оқими йўналишлари босқичма-босқич кенгаяётганлигидан далолат беради.

Аввалроқ Марказий банк биринчи яримйилликда Ўзбекистонга трансчегаравий ўтказмалар ҳажми ўтган йилнинг шу даврига нисбатан 27% ошиб, 8,2 млрд долларни ташкил этганини хабар қилганди.

Тушумларнинг асосий қисми Россиядан, айни пайтда ЕИ, АҚШ ва Буюк Британиядан ўтказмалар ҳам фаол ўсиб бораётгани қайд этилган эди. Шунингдек, банк меҳнат миграцияси географиясининг кенгайиб бораётганлигига эътибор қаратган.