28 август куни Ўзбекистонда Uzcard тўлов тизимида узилишлар кузатилди. Ягона умумреспублика процессинг марказининг хабар беришича, Uzcard тизимида режадан ташқари профилактика ишлари олиб борилган.

Қуйидагиларда вақтинчалик узилишлар бўлиши мумкин:

• банкоматлар (АТМ);
• E-POS ва POS терминаллари;
• халқаро банк карталари;
• чет элда кобейджинг карталари.

Шунингдек, Uzcard сайтида ҳам носозлик кузатилмоқда.

«Вақтинчалик ноқулайликлар учун узр сўраймиз ва мутахассисларимиз аллақачон носозликларни бартараф этиш ва тизимнинг барқарор ишлашини тиклаш устида иш олиб бораётганини маълум қиламиз», — дейилади компания хабарида.

Соат 15:53 да «Ягона умумреспублика процессинг маркази» АЖ режалаштирилмаган профилактика ишларининг якунланганини маълум қилди. Таъкидланишича, барча техник тадбирлар муваффақиятли амалга оширилди ва ҳозирги пайтда процессинг сервисларининг фаолияти меъёрий тартибда давом этмоқда.

Мобил иловалар ишлаши тўлиқ тикланган, шунингдек Uzcard банк карталари бўйича барча операциялар қайта йўлга қўйилган.