Ўзбекистон Иқтисодиёт ва молия вазирлиги «Ташаббусли бюджет» доирасида овоз бериш билан боғлиқ фирибгарлик ҳолатлари ҳақида огоҳлантирди. Ижтимоий тармоқларда норасмий Telegram ботлар орқали фуқароларга овоз бериш эвазига пул мукофотлари таклиф қилинмоқда.

Бироқ, вазирлик таъкидлашича, амалда ваъда қилинган маблағлар тўланмаяпти. Бундай ҳолатлар бўйича фуқаролар томонидан вазирликка юзлаб мурожаатлар келиб тушмоқда.

«Ушбу ҳолатларда учинчи шахслар лойиҳаларга овоз тўплаш мақсадида пул маблағлари ёки моддий қийматликлар ваъда қилган ҳолда фуқаролардан овоз тўплаб, кейинчалик мукофотларни бермайди», — дейилади хабарда.

Расмий овоз бериш фақатгина «Очиқ буджет» ахборот портали, порталнинг Androidва iOS тизимларида ишловчи мобил иловалари ҳамда Telegramʼдаги расмий бот орқали амалга оширилади.

Вазирлик эслатишича, овоз бериш жараёни 31 август куни соат 23:59 га қадар давом этади.

«Мукофотлар учун эмас, ўзгаришлар учун овоз беринг. Шахсий маълумотларингизни ҳеч кимга тақдим этманг. Фирибгарлар тузоғига тушиб қолманг», — дейилади хабарда.

Эслатиб ўтамиз, «Ташаббусли бюджет»нинг 2025 йилги 2 мавсуми доирасида овоз бериш босқичи 22 август куни бошланган эди. Лойиҳанинг ушбу мавсуми доирасида фуқаролар томонидан жами 22 263 та лойиҳалар келиб тушган бўлиб, шулардан 18 656 таси овоз бериш босқичига ўтказилган.