2 сентябрдан бошлаб автомобилларни Пискент синов мажмуасида синовлардан ўтказиш амалиёти тўхтатилади. Бу ҳақда Ўзбекистон техник жиҳатдан тартибга солиш агентлиги матбуот хизмати хабар бермоқда.

Агентликнинг қайд этишича, автомобилларни техник кўрикдан ўтказиш божхона ҳудудидадан UzTest автополигонига кўчирилиши мамлакатга техник регламентга мувофиқ транспорт тури маъқулланмаган енгил автомобилларнинг импорт қилингани учун синовларни бирма-бир ўтказишга сабаб бўлган.

Ўзбекистонда 2024 йилгача фақат 3 та дилерлик марказлари фаолият юритган бўлса, улар атиги 15 та модель учун турини маъқуллаш ҳужжатини олган. Ҳозирга келиб, 21 та хорижий компанияларнинг расмий дилерлари ўз фаолиятини бошлади ва 100 дан ортиқ автомобиль русумларига турини маъқуллаш ҳужжатлари расмийлаштирилди.

«Натижада, истеъмолчиларга сифати ва хавфсизлиги таъминланган, ҳамда кафолатланган автотранспорт воситаларини етказиб бериш тизими такомиллаштирилди. Истеъмолчиларга расмий дилерлардан турли русумдаги автотранспорт воситаларини харид қилиш имконияти яратилди», дейилади хабарда.

Расмий дилерлар ва сервис марказлари сони кескин ошганлиги ҳамда истеъмолчиларнинг улар билан ишлаш амалиёти жорий этилганидан келиб чиқиб, жорий йил 2 сентябрдан автомобилларни Пискент автополигонида синовдан ўтказиш амалиёти тўхтатилади.

Мамлакатга импорт қилинаётган автомобилларнинг сифати ва хавфсизлигини таъминлаш доимий назорат қилиниб, амалдаги талабларга кўра номувофиқликлар аниқланганда, истеъмолчилардан эътирозлар келиб тушганда ушбу автомобилларга нисбатан тегишли чоралар кўрилиши таъминланади.

Ўзстандарт фуқароларга автомобиль харидини расмий дилерлар орқали амалга оширишни тавсия қилмоқда.

Автомобилларни техник синовдан ўтказиш

2024 йилнинг 1 ноябридан Ўзбекистонда импорт қилинадиган автомобилларни техник кўрикдан ўтказиш тартиби ўзгарди. Улар божхона ҳудудида эмас, балки Пскентдаги UzTest автополигонида синовдан ўтказилмоқда.

Янгилик сезиларли навбатларнинг шаклланишига олиб келди — ҳайдовчилар кутиш бир неча кун давом этиши мумкинлигини билдиришди. UzTest навбатларни «мавсумийлик ва импорт ҳажмининг ошиши» билан изоҳлаганди. Шу билан бирга, мувофиқлик сертификатининг ўртача нархи 2,6 млн сўмдан 9,1 млн сўмгача ошиб кетди. Назорати маркази ички ёнув двигателли автомобиллар учун нархни 5,6 млн сўмгача, электромобиллар учун эса 4,48 млн сўмгача пасайтирди.

Ундан кейин, 18 ноябрдан Ягона портал орқали электрон навбат олиш имкони яратилди. Хизматдан Ягона портал орқали бепул фойдаланиш мумкин ҳамда бунинг учун ҳеч қандай ҳужжат талаб этилмайди.

Бунинг учун биринчи навбатда Божхона қўмитасининг «Ягона дарча» ахборот тизими орқали сертификатлаштириш органига электрон ариза юбориш керак. 2025 йилнинг январь ойида UzTest автополигонга электрон навбат олиш тизими ишламай қолгани ҳақидаги хабарларни рад этганди. Онлайн тизимда битта ЖШШИРга фақат битта навбат олиш мумкин. Ундан фойдалангандан кейин қайта навбат олиш мумкин бўлади.