Маъмурий жавобгарлик тўғрисидаги кодексга қўшимча ва ўзгартиришлар киритиш тўғрисидаги қонун лойиҳаси муҳокамага қўйилди. Лойиҳага кўра, утилизацияга топшириладиган ёки реализация қилиш мақсадида қисмларга бўлинадиган транспорт воситаларини ҳисобдан чиқариш тартибини бузганлик учун жавобгарлик белгиланмоқда.

Янги моддага кўра, утилизацияга топшириладиган ёки қисмларга бўлиб сотиш мақсадида давлат ҳисобидан чиқарилиши керак бўлган транспорт воситалари учун белгиланган ҳужжатлар ва давлат рақам белгиларини ваколатли органга топширмаган ҳолда утилизация қилиш ёки қисмларга ажратиш қонунбузарлик ҳисобланади.

Бундай ҳолатда фуқароларга — БҲМнинг 5 баравари (2,06 млн сўм), мансабдор шахсларга эса — 10 баравари (4,12 млн сўм) миқдорида жарима қўлланиши назарда тутилмоқда.

Таъкидланишича, 2024 йили автомашиналарни таъмирлаш устахоналаридан давлат ҳисобидан чиқарилмаган 4609 та давлат рақам белгилари топилган.

Шунингдек, устахоналарда транспорт воситасини қайд этиш гувоҳномалари ноқонуний равишда сақланаётганлиги аниқланиб, расмийлаштириб олинган.

Ўтган йил давомида фуқаролар автомототранспорт воситаларини нотариал ишончнома орқали ёки умуман ҳеч қандай ҳужжатларсиз сотиб юборган ҳолатлар учраган. Ушбу автомобиллар яроқсиз ҳолга келгани учун утилизацияга топширилган, аммо давлат ҳисобидан чиқарилмаган.

Уларга тегишли давлат рақам белгилари ноқонуний равишда бошқа транспорт воситаларига ўрнатилиб, қоидабузарликлар содир этилган. Натижада жарима қарорлари аввалги эгалар номи билан расмийлаштирилган ва пул ундириш чоралари МИБлар томонидан уларга нисбатан амалга оширилган.

Мазкур ҳолат бўйича ИИВ Йўл ҳаракати хавфсизлиги хизматига 215 та, ҳудудий ЙҲХХ бошқармаларига эса 2 870 та мурожаат келиб тушган.

Шунингдек, фуқаролар автомототранспорт воситаларини таъмирлаш устахоналаридан топиб олинган давлат рақам белгиларини ўзларининг транспортларига ўрнатиб, турли хил ҳуқуқбузарликлар содир этган.

Масалан, М.Ш. исмли фуқаро бошқа транспорт воситасига тегишли авторақамни ўзининг Malibu-2 автомашинасига ўрнатиб, 70 млн сўмдан ортиқ миқдордаги қоидабузарликлар содир этган.

Қонун лойиҳасида қўшимча қилинишича, қонунчиликка ушбу қўшимчани киритиш орқали фуқаролар ва давлатнинг манфаатларига етказиладиган зарар ҳамда ҳуқуқбузарликлар ва жиноятлар содир этилиши олди олинади.