Ўзбекистонда Ипотекани қайта молиялаштириш компанияси (ИҚМК) норасмий даромадга эга бўлган мижозларга берилган ипотека кредитларини қайта молиялаштиради. Бу ҳақда компания матбуот хизмати хабар бермоқда.

Таъкидланишича, қайта молиялаштириш бўйича янги механизм ҳамкор тижорат банкларига ипотека кредитларини янада кенгроқ қатламга тақдим этиш имконини беради. У расмий даромад ҳужжатларини тақдим эта олмайдиган, бироқ барқарор даромад манбаига эга бўлган фуқаролар учун ипотека кредитидан фойдаланиш имкониятини яратади.

«Ушбу янги маҳсулот аҳолининг банк хизматларидан фойдаланиш имкониятини кенгайтириш йўлидаги муҳим қадам ҳисобланиб, ипотека бозорини ривожлантириш учун хизмат қилади», — дейилади компания хабарида.

Президент январь ойида бўлиб ўтган йиғилишда хорижга ишлашга кетганлар Ўзбекистонда расмий даромади йўқлиги туфайли ипотека кредити ва субсидия ололмаётганини таъкидлаганди. Ҳозирда Ўзбекистонда расмий даромади йўқ, деган баҳона билан хорижда меҳнат қилаётган фуқароларга кредит ва субсидиялар берилмаяпти. Давлат раҳбари мамлакатга олти ой ичида мунтазам пул жўнатаётган фуқаролар даромадини ҳисобга оладиган тизим яратишга топшириқ берганди.

Марказий банк маълумотларига кўра, 2025 йилнинг биринчи ярмида тижорат банклари томонидан аҳолига 9,44 триллион сўмлик ипотека кредитлари ажратилди — бу 2024 йилнинг шу давридаги кўрсаткич (6,88 триллион сўм)га нисбатан 37,1 фоизга кўп. Кредит олувчилар сони 20,6 фоизга — 26 201 нафардан 31 589 нафаргача кўпайди. Ўртача ипотека кредити ҳажми 13,7 фоизга ошиб, 298,6 миллион сўмга етди.

Ипотека кредитларининг катта қисмини Иқтисодиёт ва молия вазирлиги молиялаштирди — 6,38 триллион сўм, бу ўтган йилга нисбатан 74 фоизга кўп. Ипотекани қайта молиялаштириш компанияси эса ажратилган маблағ ҳажмини 6,2 фоизга камайтирди — 800 миллиард сўмдан камроқ.