Марказий банк Ўзбекистондаги муаммоли кредитлар миқдори бўйича навбатдаги статистик рақамларни эълон қилди.

Жорий йил 1 сентябрь ҳолатига кўра, мамлакатдаги банкларда муаммоли кредитлар миқдори 21,8 триллион сўмни ташкил этган. Август ойи бошида бу рақам 22,5 триллион сўм эди. Бир ойлик қисқариш — 700 миллиард сўм.

Қайтарилмаётган ёки муддати ўтган фоизли қарзларнинг 14,9 триллион сўми давлат банкларига тегишли. Қолган 6,8 триллион сўмини эса хусусий банклар ажратган.

Энг кўп муаммоли кредитлар Миллий банкда — 3,1 триллион сўм. Бироқ мазкур банк қайтарилмаётган қарзлари августдагидан 674 миллиард сўмга камайган (3,76 триллион сўм). Яъни умумий муаммоли қарзлар қисқаришида асосий омили шу бўлган.

Агробанк (2,6 триллион сўм), Ўзсаноатқурилишбанк (2,4 триллион сўм), Асакабанк (1,9 триллион сўм) каби давлат банкларида ҳам қайтарилмаётган қарзлар улуши юқорилигича қолмоқда.

Хусусий банклардан Ипотекабанк муаммоли кредитлари улушини кескин қисқартиришга эришмоқда. Масалан, жорий йил 1 сентябрда банкка қайтарилмаётган қарзлар 2,2 триллион сўмни ташкил этган. Январь ойида бу кўрсаткич қарийб 3,6 триллион сўм эди.

Сўнги йилларда Ўзбекистонда муаммоли кредитлар улуши сезиларли ўсиб борган. Масалан, 2020 йил якунида мамлакатда муаммоли кредитлар 5,8 триллион сўм бўлган. 2021 йил охирига келиб, бу миқдор деярли уч баробарга — 17 триллион сўмгача ошган. Кейинги ўсиш тўлқини 2024 йилга тўғри келган. Ўтган йил 1 январда муддати ўтган кредитлар 16,6 триллион сўм эди. Бир ой ичида мазкур кўрсаткич 20 триллион сўмгача чиққан, ҳали ҳам ушбу суммадан пасаймаяпти.

Аввалроқ Марказий банк масъули муаммоли кредитларнинг 25 фоизи жисмоний, 85 фоизи юридик шахслар ва якка тартибдаги тадбиркорлар ҳиссасига тўғри келишини маълум қилганди.