Президент Шавкат Мирзиёев касаба уюшмалари фаоллари ва фахрийлари билан учрашувда меҳнат муносабатларини яхшилаш бўйича келгуси вазифаларни муҳокама қилди.

Иқтисодиёт барқарор ўсиб, аҳоли турмуш фаровонлигини шунга мос равишда ошириш учун меҳнатга ҳақ тўлашнинг энг кам миқдори ҳам ҳар йили кўпайтириб борилмоқда. Аммо бу масалалар кўпинча давлат идораларининг ҳисоб-китоби ва таклифи билан ҳал қилинмоқда.

Шу боис, келгуси йилдан меҳнатга ҳақ тўлашнинг энг кам миқдорига оид қонунчилик ҳужжатлари лойиҳасини ишлаб чиқишга Ижтимоий-меҳнат масалалари бўйича Касаба уюшмалари федерацияси, Бандлик вазирлиги, Иш берувчилар конфедерациясидан иборат уч томонлама республика комиссиясини ҳам жалб қилиш таклиф қилинди.

Бу меҳнатга ҳақ тўлашнинг энг кам миқдорини белгилашда ходимлар манфаатини кафолатли ҳимоя қилиш бўйича янгича ёндашув бўлиши қайд этилди.

«Инсон қадри, унинг ҳаёт сифати фақат иш ҳақи билан эмас, балки ижтимоий муҳит билан ҳам белгиланади. Бунинг учун ходимларни уй-жой, сифатли таълим, тиббиёт ва транспорт хизматлари билан кафолатли таъминлаб, энг муҳим ҳаётий эҳтиёжларига етадиган даромад топишига шароит яратиб беришимиз зарур», — деди президент.

Бугунги кунда 6 млнга яқин аҳоли ўзини ўзи банд қилиб, дастурчи, веб-дизайнер, ҳунарманд, такси ҳайдовчиси, курьер каби ўнлаб касбларда платформали бандлик асосида ишламоқда.

Кўплаб фуқаролар, айниқса, хотин-қизлар масофадан туриб меҳнат қилишни ўргангани, маҳаллаларни «драйвер» соҳаларга ихтисослаштириш ҳисобидан 1,5 млн оила ўз хонадонида ишлаб, даромад олаётгани таъкидланди.

Бу йўналишлар иқтисодий тараққиётнинг бир қисмига, уларда фаолият юритаётган одамлар эса меҳнат муносабатларининг тенг ҳуқуқли субъектига айланаётгани айтилди.

Касаба уюшмалари ҳам маҳаллалар билан яқиндан ишлайдиган самарали тизимни йўлга қўйиш таклиф қилинди. Бандлик вазирлигига касаба уюшмалари билан биргаликда таклифларни ҳукуматга киритиш топширилди.

Бунда платформаларда фаолият юритаётган фуқароларнинг меҳнат ҳуқуқларини ҳимоя қилиш ва меҳнат муҳофазасини таъминлаш, уларнинг ҳаёти, хавфсизлигини суғурталаш таклифлар киритилади.

Ўзбекистонда 1 августдан бошлаб меҳнатга ҳақ тўлашнинг энг кам миқдори 1 млн 271 минг сўм этиб белгиланган. Шунингдек, шу санадан бошлаб буджет ташкилотлари ходимларининг иш ҳақи ва стипендиялар миқдори ҳам 10% га оширилди.