АҚШ Ўзбекистонга бир неча млрд долларлик автомобиль эҳтиёт қисмларини етказиб беради ва UzAuto Motors давлат компаниясини хусусийлаштириш жараёнида иштирок этиш имкониятини кўриб чиқмоқда. Бу ҳақда АҚШ Давлат департаменти хабар берди.

Ўтган ҳафта Шавкат Мирзиёев Марказий Осиё давлатлари ва АҚШ етакчиларининг C5+1 форматидаги саммитида иштирок этиш мақсадида АҚШга амалий ташриф билан борди. Ташриф доирасида президент Доналд Трамп билан учрашди.

Учрашувдан сўнг АҚШ президенти «мисли кўрилмаган савдо-иқтисодий келишув» доирасида 2028 йил охиригача Америка иқтисодиёти Ўзбекистондан товарлар етказиб бериш ва инвестициялар ҳисобига қарийб $35 млрд олишини маълум қилди. 2035 йилга келиб уларнинг умумий ҳажми $100 млрддан ошиши кутилмоқда.

Келишувларнинг бир қисми автомобилсозлик соҳасига тааллуқли. АҚШ Давлат департаменти маълумотларига кўра, Ўзбекистон кейинги уч йил ичида $5 млрдлик автомобиль эҳтиёт қисмларини импорт қилишни режалаштирмоқда.

Шунингдек, Ўзбекистон ва АҚШ UzAuto Motorsʼни сотиш ва хусусийлаштириш доирасида ҳамкорликни кенгайтириш имкониятларини ўрганади.

Апрель ойида президент давлат компанияларини хусусийлаштириш тўғрисидаги фармонни имзолаган эди. Хусусан, UzAuto Motorsʼдаги 99,7% лик давлат улушини сотиш учун 2025 йилнинг тўртинчи чорагида маслаҳатчиларни жалб қилиш, 2026 йилнинг биринчи чорагида эса очиқ савдоларни эълон қилиш вазифаси қўйилган.

6 ноябрь куни Вашингтонда Шавкат Мирзиёев АҚШнинг General Motors International компанияси глобал ижрочи директори Шилпан Аминни қабул қилди. Томонлар ишлаб чиқариш ҳамкорлигини ривожлантириш, ишлаб чиқарилаётган маҳсулотлар турини кенгайтириш ва маҳаллийлаштириш даражасини ошириш масалаларини муҳокама қилдилар.

Бундан ташқари, учрашувда замонавий машинасозликда талаб юқори бўлган янги технологиялар ва хомашё ресурслари соҳасида қўшма лойиҳаларни амалга ошириш истиқболлари кўриб чиқилди.