Осиё тараққиёт банки (ОТБ) Ўзбекистонда, жумладан кичик корхоналар учун ҳам молиялаштириш имкониятларини кенгайтириш мақсадида 300 млн доллар ажратишни маъқуллади. Бу ҳақда банкнинг расмий сайтида эълон қилинди.

ОТБ томонидан тасдиқланган кредитнинг $100 млни имтиёзли шартларда ажратилади. Молиялаштириш микро, кичик ва ўрта корхоналар (МКО), хусусан аёллар бошқарадиган корхоналар учун молиялаштириш имкониятларини кенгайтириш ва микромолия секторини мустаҳкамлаш бўйича ҳукумат саъй-ҳаракатларини қўллаб-қувватлашга мўлжалланган.

Ушбу сиёсатга асосланган маблағ инклюзив иқтисодий ўсишни рағбатлантириш ва тадбиркорликни ривожлантиришга қаратилган.

Режалаштирилган чора-тадбирлар орасида микрокредитларнинг максимал миқдорини ошириш, микромолиялаш соҳасидаги норматив ҳужжатларни такомиллаштириш, Тадбиркор аёлларни молиялаштириш халқаро кодексига қўшилиш, шунингдек, исломий микромолиялаш учун норматив базани ишлаб чиқиш кабилар бор.

Ушбу қадамлар аҳолининг заиф қатламлари учун молиявий имкониятларни кенгайтириш ва соҳанинг барқарор ривожланишини қўллаб-қувватлашга қаратилган.

«ОТБ Ўзбекистоннинг янада инклюзив ва бозорга йўналтирилган молия тизимига ўтишини қўллаб-қувватлаётганидан фахрланади», — деди банкнинг Ўзбекистондаги доимий ваколатхонаси директори Канокпан Лао-Арая.

Унинг қайд этишича, дастурнинг амалга оширилиши ўзини ўзи банд қилганлар ва микро тадбиркорлар учун молиялаштиришдан фойдаланиш имкониятини очади, гендер тенглигини рағбатлантиришга ёрдам беради ва молия секторида истеъмолчилар ҳуқуқларини ҳимоя қилишни кучайтиради.