Октябрь ойи якунларига кўра, барча турдаги автотранспорт воситалари савдоси 112,5 минг донага етди. Бу ҳақда Иқтисодий тадқиқотлар ва ислоҳотлар маркази таҳлилида келтирилган. Бу кўрсаткич ўтган ойга нисбатан 11 фоиз юқори. Савдо фаоллиги барча асосий бозор сегментларида ошгани қайд этилди.

Бирламчи ва иккиламчи бозорларда енгил автомобиллар сегменти ойлик 12,7 фоиз ўсишни кўрсатди ва 95,4 минг донани ташкил етди.

Энг юқори ўсиш Наманган, Жиззах ва Бухоро вилоятларида қайд этилган бўлиб, бу ҳудудларда савдолар 20 фоиздан зиёд ошди.

Шу билан бирга, Самарқанд вилояти ва Қорақалпоғистон Республикасида фаоллик бироз пасайгани кузатилди.

Бирламчи автомобиль бозори

Ўтган ойда бирламчи бозорда енгил автомобиллар савдоси қарийб 19 фоизга ошди, бу эса қўшимча 6 минг дона автомобиль сотилганини кўрсатади.

Сегмент доирасида маҳаллий ишлаб чиқарилган янги енгил автомобиллар тоифасида сотувлар 33,4 минг донага етди, бу ўтган ойга нисбатан 22%га ўсди.

Янги хорижий автомобиллар сотуви бироз ўсиш (+1,1 фоиз) билан сентябрь ойи кўрсаткичларидан ошиб, 4,5 минг донани ташкил этди.

Иккиламчи автомобиль бозори

Октябрь ойида енги автомобилларининг иккиламчи бозорида сотувлар ўтган ойга нисбатан 9 фоизга ошиб, 57,4 минг донани ташкил этди.

Иккиламчи бозорда электромобиллар сотуви 3 минг донадан ошиб, ойлик ҳисобда 15,2 фоиз ўсиш қайд этилди. Ушбу кўрсаткич ўтган йилнинг шу даврига нисбатан 2,3 баробар кўпдир.