Ўзбекистонда фуқароларга маошини оладиган банкни танлаш ҳуқуқи берилиши режалаштирилмоқда. Бу ҳақда «Ўзбекистонда молиявий технологиялар соҳасини янада ривожлантириш чора-тадбирлари тўғрисида»ги президент қарорида кўзда тутилган.

Қарор билан 2025—2026 йилларда молиявий технологиялар соҳасини қўллаб-қувватлаш дастури тасдиқланган бўлиб, унга кўра, чакана банк хизматлари ва тўловлари бозорида рақобатни ривожлантириш мақсадида мажбурий мижозлар аудиториясидан воз кечган ҳолда фойдаланувчиларга банк картасини очишда танлов имконияти яратилади.

Фуқароларга ўз маошини оладиган банкни ёки электрон ҳамён провайдерини танлаш ҳуқуқи берилади. Марказий банк раиси Тимур Ишметов 2025 йил декабрида шунга қаратилган чора-тадбирларни ишлаб чиқиши лозим.

Тимур Ишметов, шунингдек, 2026 йил июнида Марказий банк томонидан бошқариладиган тўлов тизимларида оммавий (тўпламли) тўловлар функциясини яратиши кераклиги белгиланди.

Ноябрь ойида банк карталари бўйича янги тартиблар белгиланди. Эндиликда 14-18 ёшдаги вояга етмаган шахслар ўзлари мустақил, 14 ёшгача бўлганлар эса ота-онасидан бири ёки қонуний вакилининг ёзма розилиги асосида тижорат банкларида банк картасини очишлари мумкин.