Марказий банк тижорат банклари ва тўлов ташкилотларига мобил иловалар орқали ўтказмалар амалга оширилганда «ўтказма мақсадини кўрсатиш» вазифасини юклади. Регулятор матбуот хизматининг «Kommers.uz» нашрига маълум қилишича, ушбу хат тавсиявий характерга эга бўлиб, бу мажбурий талаб эмас.

Марказий банк тижорат банклари ва тўлов ташкилотларига мобил иловалар орқали ўтказмалар амалга оширилганда «ўтказма мақсадини кўрсатиш» бўйича кўрсатма жўнатди. Унга кўра, фойдаланувчи ўтказмани амалга оширганида мажбурий равишда ўтказма мақсадини танлаши керак бўлади. Ҳозирча айрим иловаларда бу талаб ишга туширилган, айримларида эса йўқ.

Регуляторга кўра, рақамли хизматларни ривожлантириш доирасида банклар ва тўлов ташкилотлари мобил иловалар функционалини босқичма-босқич такомиллаштириб бормоқда. Жумладан, пул ўтказмаларида айрим аниқлаштирувчи параметрлар жорий этилиши мумкин.

Қайд этилишича, бу техник хусусиятга эга янгиланиш бўлиб, операцияларнинг тўғри қайта ишланиши, сервис сифатини ошириш ва тизим барқарорлигини таъминлашга қаратилган. Киритилган маълумотлар мобил илованинг стандарт ишлаш жараёни доирасида қайта ишланади ва учинчи шахсларга тақдим этилмайди.

Муҳими:

• мазкур янгиланишлар тўловларни чеклашни назарда тутмайди;
• ўтказмалар амалдаги тартибда давом этади;
• тўловни амалга ошириш механизми ўзгармайди (қўшимча ҳужжат ёки мураккаб жараён йўқ).

Таъкидланишича, ушбу амалиёт жаҳон тажрибасида кенг қўлланилади. Масалан, турли халқаро банк иловаларида (скриншотларда келтирилган мисоллар каби) тўлов мақсади, категория ёки изоҳ майдонлари мавжуд.

«Яна бир муҳим жиҳат: Ушбу хат тавсиявий характерга эга. Бу мажбурий талаб эмас», — дейилади МБ изоҳида.

Қандай шаклда жорий этиш, қачон жорий этиш ва нечта параметр қўшиш — ҳар бир банк ёки тўлов ташкилотининг ўзига боғлиқ экани билдирилди. Бу уларнинг мобил илова архитектураси, техник инфратузилмаси ва ички жараёнларидан келиб чиқиб белгиланади.

«16 та параметр» деган тушунча ягона мажбурий рўйхат эмас. Бу умумий намунавий ёндашув бўлиши мумкин. Айрим банкларда камроқ, айримларида бошқача форматда бўлиши эҳтимол, — дейилади хабарда.

Шу билан бирга, регулятор ушбу янгилик орқали тўпланадиган маълумотлар солиқ ёки бошқа идораларга юборилмаслигини маълум қилди.