Tesla компаниясининг нархи 1 трлн доллардан ошди
Hertz Global Holdings Inc 100 мингта электромобилга буюртма бергани сабаб компания акциялари кескин кўтарилди
Миллиардер Илон Маск асос солган Tesla компаниясининг бозор қиймати Нью-Йорк фонд биржасидаги аукционда 1 триллион доллардан ошди. Бу ҳақда ТАСС нашри ёзмоқда.
Маълум қилинишича, Tesla акциялари 25 октябрь куни Hertz Global Holdings Inc билан тузилган шартнома туфайли кўтарилган. Компания Tesla’га 100 мингта электромобиль буюртма берган. Акциялар қийматининг ўсиши 9 фоиздан ошди, бу эса Tesla нархининг 1 триллион долларлик чегарадан ўтиб кетишини таъминлади.
Илон Маскнинг компанияси ҳалигача бозор етакчиларидан анча ортда қолмоқда: Apple’нинг бозор қиймати, масалан, 2,46 триллион долларни, Microsoft’ники — 2,3 триллион долларни ташкил этади. Шунга қарамай, Tesla 1 триллион долларлик чегарадан ўтиш бўйича рекорд ўрнатди. Бунинг учун унга 18 йилдан камроқ вақт керак бўлди (компанияга 2003 йил 1 июлда асос солинган).
Tesla акцияларининг ўсиши фонида Илон Маскнинг бойлиги 250 миллиард долларга яқинлашди. Аввалроқ Илон Маск дунёдаги биринчи триллионерга айланиши мумкинлиги ҳақида хабарлар тарқалганди.
