Ҳозирда фонд бозорлари ҳаддан ташқари юқори баҳоланиб юборилган ва вазият 1990-йиллар охиридаги дотком буми давридагидан ҳам «ақлдан озган». Бу ҳақда Berkshire Hathaway вице-президенти Чарли Мангер (Forbes Real-Time маълумотларига кўра, бойлиги 2,2 миллиард доллар) Сиднейдаги инвесторлар учун хайрия конференциясида маълум қилди.

«Умуман олганда, менимча, бу давр дотком давридан ҳам ҳайратланарли», — деди Уоррен Баффетнинг 97 ёшли ҳамкори.

Bloomberg’нинг таъкидлашича, S&P 500 дунёда коронавирус пандемияси бошланган 2020 йил март ойидан бери икки баравар кўпроққа қимматлаган. Bank of America ва EPFR Global маълумотларига кўра, инвесторлар 2021 йилда 900 миллиард долларга яқин капитал маблағларини ўзлаштиришган — бу сўнгги 19 йилдагидан кўп.

Мангер Evergrande дефолт таҳдиди ва АAlibaba, Tencent ҳамда Didi акцияларининг қулаши ҳақидаги инвесторлар хавотирларига қарамай, Хитойнинг йирик компанияларни ушлаб туриш сиёсатини қўллаб-қувватлади.

«Улар бумни чеклаш ва унинг узоққа боришига йўл қўймасликлари тўғри йўл. Менинг мамлакатим бундай қилолмаётганини ҳисобга олсак, биз Хитойдан орқадамиз», — деди америкалик инвестор.

Маълумот учун, Мангер 1978 йилдан бери Berkshire Hathaway директорлар кенгашида ишлайди. Миллиардер шу вақт ичида компания ўз активларини 220 миллион доллардан 460 миллиард долларгача оширди.