Wildberries интернет-дўконининг асосий эгаси Татьяна Бакалчук 2021 йилда молиявий ҳолатининг фоизда ўсиши бўйича дунёдаги барча миллиардерлар орасида етакчига айланди. Бакалчукнинг бойлиги 1000 фоизга ошди. Бу ҳақда Forbes ёзмоқда.

Қайд этилишича, 2021 йилда Россиянинг энг бадавлат тадбиркорлари рейтингини тузишда Бакалчукнинг бойлиги 13 миллиард долларга баҳоланган. Шу тариқа, миллиардер рейтингда 13-ўринни эгаллаган. Ваҳоланки, бир йил олдин у 1 миллиард долларга тенг молиявий ҳолат билан 93-ўринда қайд этилган.

Маълумот ўрнида, Бакалчук «Вайлдберриз» МЧЖнинг 99 фоизига эгалик қилади, яна 1 фоизи унинг турмуш ўртоғи Владиславга тегишл.

Forbes 2021 йилда бойлиги энг кўп ўсган россияликлар орасида Telegram асосчиси Павел Дуровни ҳам қайд этган. Россиянинг 2020 йилги Forbes рўйхатида у 3,4 миллиард доллар бойлиги билан 30-ўринни эгаллаган эди, 2021 йилга келиб эса 17,2 миллиард доллар билан 9-ўринни эгаллади, бу 400 фоиздан кўпроқ ўсишдир.

Tesla асосчиси ва бош директори Илон Маск бойлиги ўсиши бўйича жаҳон етакчисига айланди. Йил бошидан бери унинг бойлиги 110 миллиард долларга ортган. Маск ҳозирда Forbes талқини бўйича дунёдаги энг бой миллиардерлар рўйхатини бошқариб турибди. Ноябрь ойи бошида тадбиркор бойлиги 300 миллиард доллардан ошган биринчи шахсга айланди.

Аввалроқ Forbes дунёнинг энг нуфузли аёллари рейтингини эълон қилганди.