«Металлоинвест» асосчиси Алишер Усмонов ўзининг компаниясини «яшил» металлургияда етакчи деб ҳисоблашини маълум қилди. Бу ҳақда «Коммерсантъ» хабар берди.

Миллиардернинг сўзларига кўра, «Металлоинвест»да СО2 миқдори камайтирилган юқори сифатли хомашё ишлаб чиқариш тизими мавжуд.

Нашрга кўра, «Металлоинвест» иссиқ брикетли темир (ИБТ) ишлаб чиқариш бўйича дунёда етакчи ҳисобланади. У электродуг печларида қўлланилади, бу эса синтерлаш жараёнига нисбатан анча паст энергия сарфи ва камроқ эмиссия билан пўлат ишлаб чиқариш имконини беради.

Чўян ишлаб чиқариш билан солиштирганда, ИБТ ишлаб чиқариш учун энергия истеъмоли 35 фоиз камроқ сарфланади, иссиқхона газлари эмиссияси эса 60 фоиз камроқ чиқарилади.

Жаноб Усмонов «Металлоинвест» ташкил этилганининг 15 йиллиги муносабати билан «Россия 24» телеканалига интервью берди. Тадбиркорнинг айтишича, CО2 миқдори паст бўлган хом ашё «жуда жиддий мавзу, бу бутун Европага таъсир қилади».

«Чунки домна печлари ва конверторлар аста-секин қисқаради, электр металлургия кучаяди. У ерда эса биз ишлаб чиқарадиган хом ашё керак бўлади. Ҳозирча биз етакчимиз», — дейди миллиардер.

Унинг сўзларига кўра, компания ҳар уч-тўрт йилда янги мажмуаларни бирин-кетин қурмоқда.

«Ҳозир биз бир вақтнинг ўзида тўртинчи ва бешинчисини қурмоқдамиз. Бирдан иккита. Бу бизга 10 миллион тоннани беради, агар металлургия корхоналари зарядида 20-30 фоиз ИБТ хомашё сифатида ишлатилишини ҳисобга олсак. Албатта, классик корхоналар кейинроқ ўтказилади», — дейди Алишер Усмонов.

Мисол сифатида тадбиркор Германияни келтирди, унинг сўзларига кўра, ушбу давлат ИБТ асосида 35 миллион тонна пўлат ишлаб чиқармоқда.

«Биз уларга Европани тоза хом ашё билан таъминлаш учун трамплинлардан бири сифатида қараймиз. Бунда «Металлоинвест» олдидаги бугунги муҳим вазифани кўрамиз», — дейди у.

Worldsteel глобал пўлат ассоциацияси маълумотларига кўра, 2020 йилда ишлаб чиқарилган ҳар бир тонна пўлат атмосферага 1,8 тонна CО2 чиқарилишига олиб келган. Иқлим бўйича Париж келишувига кўра, Россия 2030 йилгача CО2 чиқиндиларини 1990 йилдаги даражадан 25-30 фоизга камайтиришни режалаштирмоқда.

PwC ҳисоб-китобларига кўра, 2019–2020 йилларда Россия иссиқхона газлари чиқиндиларини 4 фоизга қисқартирган. Бу жаҳон ўртача кўрсаткичидан юқори ва G7 мамлакатлари даражасидан 5,7 фоизга паст.

Аввалроқ Алишер Усмонов ҳолдинги акцияларини сотиши ортидан VK бош директори ишдан кетиши хабар қилинганди.