Ўзбекистонда рақамли молиявий хизматлар истеъмолчиларининг ҳуқуқларини ҳимоя қилиш стандартлари белгиланди. Бу ғақда Марказий банк матбуот хизмати хабар берди.

Қайд этилишича, истеъмолчиларнинг рақамли хизматлардан фойдаланишда хавфсизлигини таъминлаш учун бартараф этилиши зарур бўлган бир қанча хатарларни камайтириш мақсадида Марказий банк бошқаруви томонидан кредит ва тўлов ташкилотлари учун тавсиявий характерга эга бўлган рақамли молиявий хизматлар истеъмолчиларининг ҳуқуқ ва манфаатларини ҳимоя қилиш стандартлари тасдиқланди.

Ушбу стандартларда рақамли молиявий хизматлар тушунчаси истеъмолчиларга тақдим этиладиган хизматлар бўйича ахборотларнинг минимал ҳажми, уларни тақдим этиш қоидалари ва тартиби, шунингдек, мазкур хизматларни кўрсатишда фойдаланиладиган дастурий таъминотга қўйиладиган талаблар белгилаб қўйилди.

Бундан ташқари, мазкур стандартларнинг амалиётга татбиқ этилиши:

• истеъмолчиларнинг ҳуқуқлари ва қонуний манфаатларига риоя этилишини таъминлаш;
• тақдим этилаётган хизматлардан истеъмолчиларнинг тўлақонли хабардор эмаслиги ва уларни тушуниб етмаслиги натижасида хизмат кўрсатувчи ташкилотлар ҳамда учинчи шахслар томонидан фирибгарлик ва/ёки адолатсиз амалиётлар бажарилишининг олдини олиш;
• рақамли молиявий хизматлардан фойдаланишда истеъмолчилар учун юзага келиши мумкин бўлган хатарларни камайтиришга хизмат қилади.

Аввалроқ Ўзбекистонда масъулиятли кредитлашнинг умумий тамойиллари тасдиқланганди.