Марказий банк 2021 йили Ўзбекистонда инфляцион муҳитни юзага келтирган асосий омилларни маълум қилди.
Хабар берилишича, 2021 йил якунлари бўйича инфляция кўрсаткичлари оралиқ мақсадли кўрсаткич — таргет даражасида шаклланиб, 10 фоизни ташкил этган.
Қайд этилишича, 2021 йил давомида инфляцион муҳитни юзага келтирган асосий омиллар озиқ-овқат ва энергия-ёқилғи маҳсулотлари нархларининг сезиларли даражада ўсиши бўлган.
Нархларнинг ўсиши, бир томондан, глобал инфляцион тенденциялар билан, иккинчи томондан эса, ички бозордаги рақобат ва таклиф билан боғлиқ сабаблар билан изоҳланади.
Аввалроқ Марказий банк асосий ставкани ўзгаришсиз қолдиргани хабар қилинганди.
