Илон Маскнинг Starship кемаси бу йил орбитага чиқади. Бу ҳақда Reuters хабар берди.
Маълум қилинишича, Илон Маск Ой ва Марсга учиш учун мўлжалланган янги Starship космик кемаси биринчи марта 2022 йилда Ер орбитасига чиқишига ишончи комил эканини билдирган.
«Айни дамда бу йил Starship’ни орбитага чиқаришимизга ишончим комил», деган Маск Техас штатида жойлашган Starbase’даги чиқишида.
SpaceX асосчисининг тан олишича, унинг жамоаси Super Heavy ракетаси учун Raptor 2 двигателларини ишлаб чиқишда қийналган. Маскнинг тушунтиришича, асосий муаммолардан бири двигатель камералари ичидаги юқори иссиқликдан юзага келадиган эриш бўлган.
Бироқ, компания бу муаммони ҳал қилишга жуда яқин ва келгуси ойга қадар ишлаб чиқариш ҳафтасига 7–8 двигателга кўпайтирилиши кутилмоқда. Йил охиригача эса ҳар ой янги Starship ва ташувчи ракета ишлаб чиқарилади.
Шу билан бирга, SpaceX бошқа муаммога дуч келиши мумкин. Федерал авиация маъмурияти (FAA) ҳозирда Бока Чикадаги SpaceX мажмуасини экологик экспертизадан ўтказмоқда. Келгуси ҳафталарда регулятор ҳудуднинг режалаштирилган ривожланиши атроф-муҳитга хавф туғдирадими ёки йўқлигини ҳал қилиши кутилмоқда.
«Бизда FAA билан ишлар қандай кечаётгани ҳақида тўлиқ маълумот йўқ. Биз рухсатнома март ойида олиниши мумкинлиги ҳақида тахминий кўрсатмалар олдик. Аммо биз билган нарса шу холос», — деган Маск вазият ҳақида.
Аввалроқ Илон Маскнинг SpaceX компанияси 2022 йил рекорд даражада кўп ракета учириши хабар қилинганди. Шунингдек, NASA биринчи марта бошқа сайёрадан ракета учириши ҳақида хабар берилди.
