Миллиардер ва сармоядор Жорж Сорос электромобиль ишлаб чиқарувчи Rivian компаниясининг 20 миллионга яқин акцияларини сотиб олди. Бу ҳақда Reuters хабар берди.

Маълумотларга кўра, Жорж Сорос харидни 2021 йилнинг тўртинчи чорагида амалга оширган. Ўша пайтда акциялар қиймати 2 миллиард долларга яқин бўлган.

Ушбу харид Soros Fund Management компаниясини ҳали биринчи электромобиль ишлаб чиқаришни бошламаган компаниянинг асосий инвесторларидан бирига айлантирган. 20 фоиз улуши Amazon’га тегишли бўлган Rivian электрон тижорат компаниясига 100 мингдан ортиқ электр юк машиналарини етказиб бериши кутилмоқда.

Чорак якунига кўра, портфелдаги Америка акцияларининг қиймати 1,2 миллиард долларга ошиб, 6,5 миллиард долларни ташкил этган. Жамғарма бошқарувидаги активларнинг умумий қиймати 28 миллиард доллардан ошган.

Қайд этилишича, 2021 йил охирида Rivian ўзининг электр пикап ва катта аккумуляторли спорт транспорт воситасини етказиб беришни 2023 йилгача кечиктиришга қарор қилган. Бироқ, компания бош директори Роберт Скеринг АҚШ ва Канадада ишлаб чиқарилган R1T пикаплари ва R1S йўлтанламасларига 71 мингта буюртма беришнинг аксарияти кичик аккумуляторли электр транспорт воситалари эканини маълум қилган. Rivian ҳозиргача ишлаб чиқарилган 652 та машинадан 386 тасини, жумладан, пикап ва йўлтанламасни етказиб берган.

Шунингдек, 2022 йил январь ойида Rivian акциялари 5,6 фоизга арзонлашган. Бу Amazon Rivian билан эксклюзив ҳамкорликни тўхтатгандан кейин содир бўлган. Бу янгилик компания сармоядорларининг ишончини пучга чиқарган, чунки Amazon билан эксклюзив ҳамкорлик IPO’дан кейин электромобиль ишлаб чиқарувчисининг қимматли қоғозлари нархи ошишига асосий сабаб бўлган. Акцияларнинг умумий пасайиши 43 фоизини ташкил этган. Rivian’нинг ҳозирги нархи 58,85 долларни ташкил этади.

Аввалроқ Amazon баёнотидан сўнг Rivian акциялари «қулагани» хабар қилинганди. Шунингдек, Tesla’нинг рақобатчиси Rivian капиталлашув бўйича Volkswagen’ни ортда қолдиргани ҳақида хабар берилди.