Amazon баёнотидан сўнг Rivian акциялари «қулади»
Америка электрон тижорат гиганти бошқа компания билан ҳамкорлик қилмоқчи.
Электромобиль ишлаб чиқарувчи Rivian компаниясининг акциялари 5,6 фоизга тушиб кетди. Бу ҳақда Financial Times хабар берди.
Қайд этилишича, Rivian акцияларининг қулаши Amazon онлайн-ритейлери ушбу компания билан эксклюзив ҳамкорликни тўхтатгандан кейин содир бўлган. NASDAQ биржа савдолари маълумотлари ҳам буни тасдиқлайди.
Маълумот учун, Amazon Rivian билан компаниянинг 100 минг дона электромобилини сотиб олиш бўйича эксклюзив шартнома имзолаган эди, аммо энди Америка электрон тижорат гиганти бошқа автомобиль ишлаб чиқарувчилар, жумладан Fiat-Chrysler’нинг шўба корхонаси Stellantis билан ҳамкорлик қилишни режалаштирмоқда.
Ушбу хабар инвесторларнинг Rivian’га бўлган ишончини пучга чиқарди, чунки Amazon билан эксклюзив ҳамкорлик IPO’дан кейин электромобиль ишлаб чиқарувчи компаниянинг акциялари ўсишига асосий сабаб бўлганди.
Rivian’нинг йиллик ҳисоботига кўра, компания 2021 йилда мингтадан сал кўпроқ электромобиль ишлаб чиқарган. Бироқ йил бошида 1,2 мингта электромобиль ишлаб чиқариш башорат қилинганди.
Аввалроқ Tesla’нинг рақобатчиси Rivian АҚШда 5 миллиард долларлик янги завод қуриши ҳақида хабар қилинганди.
