Электромобиль ишлаб чиқарувчи Rivian бозор қиймати бўйича Европанинг энг йирик автомобиль ишлаб чиқарувчиси Volkswagen’ни ортда қолдирди. Бу ҳақда Bloomberg нашри хабар берди.

Rivian акциялари нархи 16 ноябрь куни Nasdaq’да қарийб 14 фоизга ошиб, 169,7 долларга етди. Бу биржа маълумотларига кўра, компания IPO пайтида акцияларини жойлаштирган нархдан (78 доллар) деярли 118 фоизга юқори.

Натижада Rivian’нинг капиталлашуви 150 миллиард долларга яқинлашди. Бу Volkswagen’нинг бозор қийматидан (138,7 миллиард доллар) кўпроқ. Porsche, Audi ва Lamborghini брендларига ҳам эгалик қилувчи Volkswagen йилига 10 миллионга яқин автомобиль ишлаб чиқаради ва йилига тахминан 250 миллиард евро даромад қилади.

Rivian’нинг дебют ҳафтаси 2021 йилда биржада рўйхатга олинганлар орасида энг яхшиси ҳисобланади. Шу билан бирга, компания ҳали оммавий ишлаб чиқаришни бошламаган ва ноль даромадга эга. Rivian фақат сентябрь ойида автомобилларни, асосан ўз ходимларига жўнатишни бошлади. Компания 2023 йилда 150 мингта автомобиль ишлаб чиқаришни режалаштирмоқда. Rivian’нинг асосий мижози Amazon ҳисобланади.

Аввалроқ Hertz билан шартнома ҳали имзоланмагани маълум бўлганидан сўнг Tesla акциялари нархи 7 фоиз пастлаганди.