Россиялик миллиардер Роман Абрамовичдан «Челси» футбол клубини сотиб олиш учун асосий даъвогарлар аниқланди — уларнинг барчаси АҚШдан. Бу ҳақда Financial Times хабар берди.
Маълум қилинишича, энг қизиқарли таклифлар икки гуруҳ томонидан берилган. Улардан бирига америкалик молиячи ва Los Angeles Dodgers эгаси Тодд Бойли бошчилик қилади, иккинчисига — америкалик инвесторлар Жош Харрис ва Девид Блитцер, Philadelphia 76ers баскетбол гуруҳининг эгалари.
Таъкидланишича, клубнинг нархи тахминан 3 миллиард фунт (3,95 миллиард доллар) бўлиши мумкин.
Баъзи бошқа аризачилар, жумладан Саудия Арабистони компаниялар гуруҳи Saudi Media Group эса 24 март куни уларнинг аризалари рад этилгани ҳақида хабар олган.
Хабарга кўра, потенциал харидорларнинг аризалари мураккаб мезонлар тўплами асосида кўриб чиқилмоқда. Бунда, масалан, сотишдан тушган пул қандай тақсимланиши ҳисобга олинади: қайси улуш хайрия ишларига йўналтирилиши, қайси улуш «Челси» ва клуб стадионига сармоя киритилиши каби.
Бундан ташқари, ариза берувчиларнинг активларни бошқариш бўйича тажрибаси ҳам ҳисобга олинади. Савдо жараёни Американинг Raine Group банки томонидан назорат қилинади.
Абрамович «Челси»га деярли 20 йиллик эгалик қилганидан сўнг, Россиянинг Украинага ҳарбий ҳужуми бошланганидан кўп ўтмай сотишга қарор қилди. Миллиардер бу қарорни 2 март куни эълон қилди. У клуб билан пул эвазига шуғулланмаганини таъкидлаб, сотувдан тушган соф тушумни Украинадаги урушдан жабрланганларга ёрдам бериш фондига юборишга ваъда берди.
Қайд этиш керакки, Буюк Британия 10 март куни Абрамовичга қарши санкциялар киритди ва бу клубнинг молиявий фаолиятига ҳам таъсир қилди. Шундан сўнг миллиардер Европа Иттифоқи, Канада ва Австралия санкцияларига ҳам дуч келди.
The Wall Street Journal нашрининг ёзишича, АҚШ Украина Президенти Владимир Зеленскийнинг маслаҳати билан Абрамовични санкциялар рўйхатига киритмаган, чунки у Украинанинг Россия билан музокараларида муҳим воситачи бўлиши мумкин.
Аввалроқ Путин Абрамовичнинг Киев билан музокараларда иштирокини маъқуллагани хабар қилинганди.
