«Челси» футбол клуби эгаси Роман Абрамович ҳамда яна олти нафар россиялик тадбиркор ва топ-менежер Украинадаги вазият туфайли Буюк Британия санкцияларига дучор бўлди. Бу ҳақда Британия Молия вазирлигининг баёнотида маълум қилинди.

Молия вазирлиги томонидан эълон қилинган ҳужжатда Абрамович «таниқли россиялик тадбиркор ва кремлпараст олигарх» сифатида тасвирланган. У ўнлаб йиллар давомида Президент Владимир Путинга яқин бўлган ва ҳокимиятга яқинлигидан фойда кўрган. Абрамовичнинг ўзи Кремль билан яқин молиявий алоқалари борлигини рад этган.

Абрамовичдан ташқари «Роснефть» бош директори Игор Сечин, «ВТБ» бош директори Андрей Костин, «Транснефть» президенти Николай Токарев, «Газпром» раҳбари Алексей Миллер, тадбиркорлар Дмитрий Лебедев ва Олег Дерипаска ҳам санкцияга тортилди.

Британия ҳукуматининг пресс-релизида айтилишича, гап активларнинг тўлиқ музлатилиши ва Британияга саёҳат қилишни тақиқлаш, шунингдек, Британия фуқаролари ва юридик шахсларига улар билан бизнес юритиш тақиқланиши ҳақида кетмоқда.

Етти нафар россиялик ҳужжатда «бизнес империялари, бойликлари ва алоқалари Кремль билан чамбарчас боғлиқ бўлган энг бой ва энг қудратли олигархлар» деб номланади. Уларга қарши санкциялар Россия Президенти ва унинг атрофидагиларни изоляция қилиш учун киритилган.

Шунга қарамасдан, «Челси» клубига футбол билан боғлиқ фаолиятни давом эттиришга рухсат берилди.

Қайд этиш керакки, 26 февраль куни Абрамович клуб бошқарувини «Челси» хайрия жамғармаси ишончли вакилларига топширди ва март ойи бошида клубни сотишга қарор қилганини айтди. У тушган маблағни Украинадаги жабрдийдалар фойдасига жамғармага ўтказишга ваъда берди.

Аввалроқ Япония Алишер Усмонов ва Рамзан Қодировга нисбатан санкциялар киритгани хабар қилинганди. Шунингдек, Европа иттифоқи яна 160 нафар россияликка қарши санкциялар эълон қилгани ҳақида хабар берилди.