Буюк Британия Олег Тиньков ва Роман Абрамовичнинг бизнес шериги Евгений Швидлерга нисбатан транспорт санкцияларини бекор қилди. Бу бўйича мамлакат Ғазначилигининг санкцияларни қўллаш бошқармаси хабарида ва янгиланган санкциялар рўйхатида сўз боради.
Буюк Британия чекловларга улар қўлланилганидан бир кун ўтиб аниқлик киритди. Тиньков ва Швидлер 24 март куни «Сбербанк» раҳбари Герман Греф ва унинг ўринбосари Александр Ведяхин ҳамда собиқ биринчи банк раиси Лев Хасис билан бирга Британиянинг молиявий санкцияларига (активларини музлатиш) учраганди. Охирги учтаси нафақат активларнинг музлатиб қўйилишга, балки саёҳат қилиш тақиқига ҳам дуч келди.
Тиньков ва Швидлерга Буюк Британияга кириш тақиқланмаган. Бироқ тадбиркорларга тегишли, бошқариладиган, назорат қилинадиган ёки ижарага олинган яхталар, кемалар ва самолётларнинг портларга кириши, мамлакат ҳаво ҳудуди орқали учиши ҳамда аэропортларига қўниши тақиқланган эди. Янгиланган санкциялар рўйхатида бу чекловлар мавжуд эмас.
Санкцияларни ижро этиш бюроси ҳужжатида қайд этилишича, Буюк Британия компаниялари ва ташкилотлари санкция қўйилган шахслар бошқарадиган ёки уларга тегишли бўлган ҳар қандай ҳисоб ва маблағларни музлатиб қўйиши, улар билан операцияларни тўхтатиши ва уларга махсус лицензиясиз пул бермасликлари шарт. Офис бунга алоқадор маълумотларни узатишни сўрайди.
Британия Тиньковни «Россия ҳукуматидан манфаатдор» деб ҳисоблади, чунки у давлат учун «стратегик аҳамиятга эга» молиявий сектор корхоналарига эгалик қилган ва уларни назорат қилган. Тиньков аввалроқ «ҳеч қачон Кремлда бўлмагани» ва ҳукуматдаги алоқаларисиз ўз бойлигини ўзи қурганини айтиб, санкцияларга эътироз билдирган эди.
Аввалроқ миллиардер Олег Тиньков Россиянинг Украинага босқинини қоралагани хабар қилинганди. Шунингдек, Олег Тиньков миллиардер мақомидан маҳрум бўлгани ҳақида хабар берилди.
