Standard & Poor’s халқаро рейтинг агентлиги (S&P Global Ratings) Фарғона вилоятининг хорижий ва миллий валютадаги узоқ муддатли кредит рейтингини B+ даражасида «Барқарор» деб баҳолади. Бу ҳақда вилоят ҳокимлиги матбуот хизмати хабар бермоқда.
Қайд этилишича, 2022 йил 3 июнь куни эълон қилинган S&P Global Ratings ҳисоботида вилоят бюджетининг юқори кўрсаткичлари ҳамда тижорий қарздорликнинг мавжуд эмаслиги эътироф этилиб, келгуси уч йил давомида вилоят бюджети ошириб бажарилиши прогноз қилинган.
Қолаверса, агентлик экспертлари фикрига кўра, қарздорлик даражаси деярли нолга тенг экани натижасида вилоятнинг ликвидлик кўрсаткичлари юқори бўлишда давом этади.
Шунингдек, вилоятнинг 2019 йилдан бошлаб молиявий-иқтисодий кўрсаткичлари ҳамда 2024 йилгача бўлган молиявий-иқтисодий ҳолати прогнози бўйича қилинган таҳлилларга кўра, рейтинг агентлиги томонидан Фарғона вилояти келгуси 12 ой ичида марказий ҳукуматдан трансферлар ҳисобига кучли бюджет кўрсаткичларини сақлаб қолиши ва ўрта муддатли истиқболда қарзга мутлақ эга бўлмаслигига ишонч билдирилган.
B+ рейтинг кўрсаткичи дунёда иқтисодий ҳолати барқарор ва молиявий жиҳатдан қарздорлиги бўлмаган ҳамда соғлом инвестицион муҳитга эга бўлган ҳудудларга берилиб, ўша ҳудуднинг халқаро доирадаги ҳолати ижобий поғонада эканини билдиради.
Маълумот учун, S&P Global Rating халқаро рейтинг агентлиги томонидан Туркия, Баҳрайн, Иордания ва Эрон каби мамлакатлар кредит рейтинглари ҳам айнан B+ даражасида баҳоланган.
Эслатиб ўтамиз, Standard & Poor’s Global Ratings халқаро рейтинг агентлиги 2021 йил 6 декабрь куни Ўзбекистоннинг суверен кредит рейтингига бағишланган йиғма ҳисоботини эълон қилганди. Ҳисоботда Ўзбекистоннинг рейтинг баҳоси «BB-» (барқарор кутилма) даражада ўзгаришсиз қолган.
