Дунёдаги энг йирик молиявий технология компаниялари (финтеч)нинг тахминий қиймати деярли ярим триллион долларга камайди. Бу ҳақда CB Insights тадқиқот компанияси экспертлари айтиб ўтди.
2020 йилдан бери ўттиздан ортиқ молиявий технология компаниялари АҚШдаги биржаларда рўйхатга олинди. Ўшанда инвесторлар пандемия даврида ўсиб бораётган рақамлаштириш уларга узоқ муддатли фойда келтиришига ишониб, ушбу компанияларга фаол сармоя киритди.
Бироқ экспертларнинг фикрига кўра, ставкаларнинг кўтарилиши, фойда йўқлиги ва бундай компанияларнинг бизнес моделларидаги ноаниқликлар уларнинг капиталлашувининг 460 миллиард долларга ёки тахминан эллик фоизга қисқаришига олиб келди.
Юқори технологияли NASDAQ Composite индекси ҳам бу вақт ичида пасайишга учради, лекин унчалик катта эмас — йигирма тўққиз фоиз.
Mizuho компанияси таҳлилчиси Дан Долевнинг FT’га айтишича, финтечлар, айниқса рақамли тўловлар билан шуғулланувчилар «пандемия даврида технология соҳасида биринчилардан бўлиб фойда кўрган, чунки ҳамма уйда ўтириб, онлайн харид қилган».
«Ҳозир бу сектор юқори технологияли бозорнинг бошқа иштирокчиларида анча олдинроқ бошланган коррекция (қимматли қоғозлар ёки валюталар нархининг тенденцияга тескари йўналишда ўзгариши. Ушбу ҳодиса маълум бир қимматли қоғоз ёки валютанинг ‘ортиқча сотиб олиниши’ ёки ‘ортиқча сотилиши’ туфайли юзага келади. Бошқа сабаблар қаторида бундай нархда савдо қилмоқчи бўлганлар йўқлиги ҳам бор) давридан ўтмоқда», — дея қўшимча қилган Дан Долев.
Аввалроқ Европадаги энг қиммат финтеч стартапи — Klarna нархи 8 бараварга тушиши мумкинлги ҳақида хабар берилганди. Klarna 2021 йил охирида Европадаги энг қиммат финтеч стартапига айланган. Стартап 2022 йилнинг биринчи чорагида 245 миллион долларлик операцион зарар кўрганини маълум қилганди.
