Россиянинг Урал кон-металлургия компанияси (УКМК) собиқ президенти, келиб чиқиши ўзбекистонлик бўлган миллиардер Искандар Маҳмудов Ставрополь ўлкасида деярли 30 минг гектар ерга эга «Агроальянс» компаниясини сотиб олди. Бу ҳақда «Коммерсантъ» нашри хабар бермоқда.
Келишув суммаси 3,1-4,2 миллиард рублни ташкил қилиши мумкин. Шунингдек, «АФГ Националь»нинг Краснодар ўлкасидаги қишлоқ хўжалиги активлари устидан назорат ҳам Махмудов тузилмаларига ўтиши мумкин.
«Косминвест» компанияси Ставропол ўлкасидаги «Агроальянс» (28 500 гектар ерга эга) фирмасининг янги эгасига айланди. «Косминвест»нинг эллик фоиз акциялари «Виолан» МЧЖ орқали УКМК собиқ президенти, миллиардер Искандар Маҳмудовга тегишли.
Манбаларнинг айтишича, Маҳмудов тузилмалари «АФГ Националь» (Краснодар ўлкасида 180 минг гектардан ортиқ ерга эга) устидан ҳам назорат ўрнатиши мумкин.
«Агроальянс» 28,5 минг гектар ерга эга бўлиб, унда ғалла, кунгабоқар, нўхат, бодринг ва бошқа экинлар етиштирилади. 2021 йилда компания 61 190 тонна маҳсулот йиғди.
УКМК «улар учинчи томон ташкилотларига изоҳ бермасликларини» айтган бўлса, «Агроальянс» жавоб бермаган. «Агроальянс»нинг аввалги эгаси «Агроальянс АПА» бўлиб, у Нидерландиянинг Tweelingen Groep B.V компанияси томонидан назорат қилинган.
2021 йил май ҳолатига кўра, «Косминвест» 127 минг гектар қишлоқ хўжалиги ерларига эга бўлиб, BEFL энг йирик ер эгалари рейтингида 41-ўринни эгаллаган. Ундан юз минг гектарга яқини Ставрополь ўлкасида, ўттиз минг гектари эса Ростов вилоятида жойлашган. «Агроальянс»ни сотиб олиш «Косминвест»га рейтингда 6-11 поғонага кўтарилиш имконини беради.
«Совэкона» директори Андрей Сизов Ставрополь ўлкасидаги қишлоқ хўжалиги ерларининг ўртача нархини бир гектар учун 110-150 минг рублга баҳолади. Шунга кўра, тузилган битим миқдори 3,1 миллиард рублдан 4,2 миллиард рублгача бўлиши мумкин. Сизовнинг айтишича, минтақа қишлоқ хўжалиги маҳсулотларини ишлаб чиқариш бўйича Россияда учинчи ўринда туради.
«Бу ердан Ростов-Дон ва Азов портлари орқали етказиб беришни ташкил қилиш, маҳсулотларни Кавказортига, биринчи навбатда Озарбойжонга экспорт қилиш ва ҳатто Волга портлари орқали жўнатиш имконияти мавжуд», — дейди Сизов.
Унинг қўшимча қилишича, Ставрополь ўлкаси бошқа жанубий вилоятларга қараганда ҳар доим ҳам қулай табиий ва иқлим шароити билан ажралиб турмайди, сўнгги йилларда бу ерлар об-ҳавоси қуруқ бўлган.
Қишлоқ хўжалиги бозорини ўрганиш институти бош директори Дмитрий Рилко минтақада ер-мулкка талаб юқорилигича қолаётганини таъкидлади. Унинг сўзларига кўра, ер банкини қуриш бутун бизнеснинг рентабеллигига ижобий таъсир кўрсатиши мумкин, бироқ уни бошқаришда қийинчиликлар юз беради.
Искандар Маҳмудовнинг агробизнесдаги активлари портфели яқин келажакда янада кенгайиши мумкин.
У билан алоқадор «Инвестком» компанияси «Россельхозбанк»дан йирик ишлаб чиқарувчи «АФГ Националь»га қарши даъво ҳуқуқларини сотиб олди ва Краснодар ўлкаси арбитраж судига «АФГ Националь» тузилмаларидан 3,35 миллиард рубль ундириш тўғрисида ариза билан мурожаат қилди. Нашр манбасига кўра, «Инвестком» «АФГ Националь» активлари устидан назоратни қўлга киритишни режалаштирмоқда.
