Франция Россиянинг Марказий банк мулкидан ташқари, 1,2 миллиард евролик активларини музлатиб қўйди. Бу ҳақда Молия вазирлигининг разведка бўлими раҳбари Гийом Валетт-Вала La Tribune нашрига берган интервьюсида маълум қилди.
Унинг сўзларига кўра, молиявий ва номолиявий активлар музлатилган.
«Ушбу чора-тадбирлар Европа Иттифоқининг шахсий санкциялар рўйхатини белгилаган қарорига мувофиқ амалга оширилди», — дея қўшимча қилди у.
Аввалроқ Адлия бўйича Европа комиссари Дидье Рейндерс Европа Иттифоқининг 27 давлатидан фақат олтитаси Россиянинг Европадаги активларини блокировка қилишда фаол иштирок этганини маълум қилганди.
Гап Германия, Франция, Ирландия, Австрия, Бельгия ва Люксембург ҳақида кетмоқда. Европа Иттифоқи ҳудудида музлатилган 13,9 миллиард евронинг 12,7 миллиард евроси ушбу давлатлар ҳиссасига тўғри келади.
Франция Европа Иттифоқи санкциялари остида қолган саккиз нафар россиялик миллиардернинг 31 та мулкини музлатиб қўйди, деб ёзди аввалроқ Американинг Forbes журнали.
Музлатилган мулклар орасида Роман Абрамович, Андрей Мельниченко, Александр Пономаренко ва бошқаларнинг Франция Ривьерасида жойлашган виллалари бор. Франция, шунингдек, Алексей Кузмичевнинг иккита яхтасини ҳам музлатиб қўйди.
Аввалроқ, 1 июль куни Франция миллий молия прокуратураси (ММП) «Владимир Путинга яқин россиялик олигархлар» томонидан мамлакатда сотиб олинган мол-мулклар бўйича дастлабки тергов ҳаракатларини бошлаганди.
