Тошкентда 7 июль куни эркак ўз шериклари билан «Давр банк» хусусий акциядорлик тижорат банки тизимига рухсатсиз кириш орқали 15 миллиард сўм миқдордаги пулни ўғирлади. Бу ҳақда Тошкент шаҳар Ички ишлар бош бошқармаси ахборот хизмати хабар берди.
Маълум бўлишича, 1976 йилда туғилган С.Ш. пулни шериги 2000 йилда туғилган Н.Ш.нинг номига очилган пластик карталарга ўтказган. Кейин Н.Ш. бу пулларнинг 11 миллиард 453 миллион 244 минг 343 сўм миқдорини ноқонуний ўзлаштирган. Ечиб олинган пуллар жиноий гуруҳ аъзолари ўртасида тақсимланган.
Таъкидланишича, мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 169-моддаси 4-қисми «а» банди («Жуда кўп миқдорда ўғрилик») аломатлари билан жиноят иши қўзғатилган. Бошқарма томонидан олиб борилган тезкор тергов ҳаракатлари натижасида 11 нафар фуқаролар гумонланувчи сифатида жалб қилиниб, қамоққа олиш эҳтиёт чораси танланган. Шунингдек, икки нафар гумонланувчилар 1986 йилда туғилган У.С ва 1988 йилда туғилган А.Э ларни ушлаш чоралари кўрилаётгани қайд этилган.
Аввалроқ «Даврбанк»ка нисбатан жарима санкцияси қўлланилгани хабар қилинганди. Унга кўра, жарима санкциясига фуқароларнинг банк картасидаги пул маблағлари уларнинг рухсатисиз ечиб олингани сабаб бўлган.
