Форс кўрфази соҳилидаги Палм-Жумейра сунъий оролида жойлашган Дубайдаги энг қиммат вилланинг махфий эгаси ҳиндистонлик миллиардер Мукеш Амбани бўлиб чиқди. Бу ҳақда икки манбага таяниб, Bloomberg хабар бермоқда.
Манбалардан бирининг маълум қилишича, Амбанига тегишли Reliance Industries саройни 2022 йилда миллиардернинг кенжа ўғли Анант Амбани учун сотиб олган.
Уй сунъий оролнинг шимолий қисмида жойлашган бўлиб, 10 та ётоқ хонаси, хусусий курорт, очиқ ва ёпиқ бассейнларга эга. Битим 80 миллион долларни ташкил этган.
Манбанинг айтишича, кўчмас мулкни сотиб олиш бўйича келишув сир бўлган. Уй Reliance Industries офшор тузилмаларидан бирига тегишли. Виллани компаниянинг топ-менежери ва Амбани Паримал Натванининг узоқ йиллик ҳамкори бошқаради.
Манбанинг сўзларига кўра, янги эгаси саройни тартибга солиш ва қўриқлаш учун «миллионлаб доллар» сарфлаш ниятида.
Мукеш Амбани Ҳиндистоннинг энг бой тадбиркори бўлиб, Forbes талқини бўйича дунёдаги энг бой миллиардерлар рейтингида саккизинчи ўринда туради. Унинг бойлиги 94,8 миллиард долларга баҳоланган.
Эслатиб ўтамиз, 2022 йилда энг бой спорт жамоалари эгалари рейтингида Мукеш Амбани (90,7 миллиард доллар, «Мумбай Индианс» эгаси) иккинчи ўринга тушиб кетганди.
