Россиялик миллиардер Роман Абрамович олти йил ичида биринчи марта Forbes’нинг энг бой спорт жамоалари эгалари рўйхатига киритилмади. 2021 йили у рейтингда саккизинчи ўринни америкалик миллиардер, «Каролина Пантерз» эгаси Девид Теппер билан бўлишган эди.

Россияга ҳамда шахсий Абрамовичга нисбатан жорий қилинган санкциялар туфайли тадбиркор Англиянинг «Челси» футбол клубини сотувга қўйишга мажбур бўлди. Абрамович уни 2003 йилда тахминан 190 миллион долларга сотиб олган бўлса, 2021 йилда Forbes журнали клубни 3 миллиард долларга баҳолаган.

Financial Times нашрининг ёзишича, Абрамовичга энг қизиқарли таклифлар АҚШлик икки гуруҳ инвесторлар томонидан қилинган, бошқа аризачилар, жумладан Саудия Арабистонининг Saudi Media Group компаниялар гуруҳи аризалари эса рад этилган. Британия расмийлари клубнинг сотилишини кутмай, миллиардернинг Британиядаги барча активларини музлатиб қўйди.

Ғарб санкциялари Абрамовичнинг нафақат спортга бўлган иштиёқига, балки унинг бойлигига ҳам таъсир қилди. Бизнесменнинг январь ойида тахминан 15 миллиард долларга баҳоланган капитали икки баравардан кўпроққа қисқарди ва ҳозирда 6,9 миллиард долларни ташкил этмоқда.

Шунингдек, 2022 йилда энг бой спорт жамоалари эгалари рейтингида Microsoft компаниясининг собиқ раҳбари Стив Балмер (91,4 миллиард доллар, «Лос-Анджелес Клипперс» эгаси) биринчи ўринни эгаллади. Аввалги рейтинг етакчиси ҳиндистонлик миллиардер Мукеш Амбани (90,7 миллиард доллар, «Мумбай Индианс» эгаси) иккинчи ўринга тушиб кетди.

Аввалроқ АҚШ Зеленскийнинг маслаҳати билан Абрамовичга қарши санкция қўлламагани хабар қилинганди. Шунингдек, Британия парламенти депутати Абрамовични «Челси»га эгалик ҳуқуқидан маҳрум қилишга чақиргани ҳақида хабар берилди.