Ўзбекистонда 2022 йилнинг I ярим йиллиги учун давлат бюджети даромадлари 92,6 триллион сўмни ташкил этди. Бу ҳақда Молия вазирлигининг давлат бюджети даромадларининг ижроси бўйича дастлабки натижалар шарҳида сўз боради.
Маълум қилинишича, 2022 йилнинг I ярим йиллиги учун давлат бюджети даромадлари 92,6 триллион сўмни ташкил этиб, 2021 йилнинг I ярим йиллигига нисбатан 17,8 триллион сўмга (+23,7 фоиз) кўп бўлган.
Солиқ тушумлари 71 триллион сўмни ёки давлат бюджети даромадлари умумий ҳажмининг 76,7 фиозини ташкил этган. Божхона тушумлари 21,5 триллион сўмни ёки давлат бюджети даромадлари умумий ҳажмининг 23,2 фиозини ташкил қилган.
Давлат бюджети даромадларининг ЯИМга нисбати 2022 йилнинг I ярим йиллигида 24,5 фоизни ташкил этиб, 2021 йилнинг шу даврига нисбатан 1 фоиз пунктга ошган. ЯИМга нисбатан улушнинг ошиши асосан билвосита солиқлардан даромадлар ва солиқ бўлмаган тушумларнинг ўсиши билан изоҳланади.
Эслатиб ўтамиз, Ўзбекистоннинг давлат бюджети даромадлари 2021 йили 164,7 триллион сўмни ташкил этиб, 2020 йилга нисбатан 31,7 триллион сўмга (+23,9 фоиз) кўп бўлганди.
