«Тинькофф Бизнес» Арманистон ва Ўзбекистонга евро ва долларда пул ўтказмаларини амалга оширишни йўлга қўйди. Бу ҳақда банк ўзининг расмий саҳифасида маълум қилди.
«Тинькофф Бизнес» чет элга валюта ўтказиш имкониятларини кенгайтирди. Эндиликда юридик шахслар «Тинькофф» орқали Арманистон ва Ўзбекистон контрагентлари билан доллар ва еврода миқдори чекланмаган ҳолда тўловни амалга ошириши мумкин. Шунингдек, тез орада «Тинькофф» Арманистондаги банкларга арман драмида (AMD), Ўзбекистонга ўзбек сўмида (UZS) пул ўтказмаларини йўлга қўяди.
Бундан ташқари,«Тиькофф Бизнес» мижозлари энди Хитойга валюта тўловларини доллар ва юанда амалга ошириши мумкин.
«Тинькофф Бизнес» маҳсулот бошқаруви раҳбари Леонид Назаровнинг таъкидлашича, ҳозирда кўплаб Россия компаниялари хорижий контрагентлар билан ҳисоб-китоб қилишда қийинчиликларга дуч келмоқда. Молиявий хабарларни узатишнинг одатий каналлари бузилган, пул-кредит ва иқтисодий фаолият билан шуғулланадиган айрим корхоналар янги ҳамкорлар ҳамда янги таъминот йўналишларини излашга мажбур бўлган.
«Биз мижозларимиз дуч келадиган қийинчиликларни тушунамиз ва шунинг учун уларнинг хорижий етказиб берувчилар билан алоқаларини соддалаштириш йўлларини излаяпмиз. Бунинг учун Арманистон ва Ўзбекистон банклари билан вакиллик алоқаларини ўрнатдик. Энди бу мамлакатлар компаниялари билан валюта ҳисоб-китоблари анча тезлашади», — дейди у.
Эслатиб ўтамиз, аввалроқ Москва биржаси Ўзбекистон сўмида савдоларни йўлга қўйиши ҳақида хабар берилганди.
Шунингдек, «Сбербанк» Ўзбекистонга рублда текин пул ўтказмаларини йўлга қўйганди.
