Ўзбекистон Марказий банки июль ойида 9 тонна олтин сотиб олди. Бу ҳақда Жаҳон олтин кенгаши (World Gold Counsil) ҳисоботида маълум қилинди.
Қайд этилишича, биринчи чоракда 25 тонналик сотувдан сўнг, йил давомидаги соф харидлар 11 тоннани ташкил этган. Ўзбекистоннинг олтин захиралари ҳозирда 373 тоннани ташкил этади (умумий захиранинг 61 фоизи).
Шунингдек, Қатар Марказий Банки миллий захираларини 15 тоннага тўлдириб олган ҳолда энг йирик олтин сотиб олувчисига айланди. Қатарнинг умумий олтин захираси 72 тоннани ташкил этади (умумий захиранинг 10 фоизи).
Ҳиндистон июль ойида расмий олтин захирасини 13 тоннага оширди. Бу 2021 йилнинг сентябридан бери энг юқори кўрсаткич демакдир (19 тонна). Ҳиндистоннинг олтин захираси йил бошидан буён 27 тоннага ошиб умумий 781 тоннани ташкил қилди.
Туркия Марказий банки июль ойида расмий олтин захираларини 12 тоннага оширди. Туркия олтин захираси йил бошидан буён 75 тоннага ошиб умумий захира икки йиллик энг юқори кўрсаткич — 469 тоннага етди.
Қозоғистон Марказий Банки июль ойида 11 тонна олтин сотиб, йил бошидан бери умумий сотувлар ҳажмини 30 тоннага етказди. Қозоғистоннинг олтин захираси 373 тоннага етиб, умумий захиранинг 64 фоизини ташкил қилмоқда.
Эслатиб ўтамиз, Ўзбекистон 2021 йилнинг декабрида 8,4 тонна олтин харид қилиб энг кўп олтин сотиб олган давлатлардан бирига айланганди.
Шунингдек, 2021 йилининг ноябрь ойида Ўзбекистон 21,5 тонна олтин сотиб дунёда энг кўп олтин сотган давлатга айланганди.
