Марказий банк аҳоли ва тадбиркорлик субъектларининг инфляцион кутилмаларини маълум қилди.
Аҳолининг инфляцион кутилмалари
Август ойида ўтказилган сўров натижаларига кўра, келгуси 12 ой учун нархлар ўсиши бўйича аҳоли вакилларининг инфляцион кутилмалари пасаювчи динамикани кўрсатиб, 15,3 фоиз атрофида шаклланган бўлса, медиана қиймати 11,9 фоизни ташкил этди.
Келгуси 12 ойда инфляция кўрсатгичи жорий даражада ёки ундан юқорироқ бўлишини кутаётган респондентларнинг улуши аввалги ойга нисбатан 1 фоиз бандга қисқарган.
Август ойида аҳолининг кўпчилик қисми келгуси 12 ойда инфляцияни 9-12 фоиз атрофида бўлишини кутишмоқда. Охирги ойларда 12 фоиздан юқори инфляцияни кутаётган респондентлар улуши қисқариб бормоқда.
Респондентлар томонидан келгуси даврда нархларга оширувчи босим кўрсатиши мумкин бўлган асосий омиллар сифатида импорт товарлари ва асосий озиқ-овқат маҳсулотлари (48 фоиз), нархларининг сунъий оширилиши (37 фоиз) ҳамда ёқилғи ва энергия ресурслари нархининг қимматлашиши (34 фоиз) таъкидланган.
Тадбиркорлик субъектларининг инфляцион кутилмалари
Жорий йилнинг август ойи якунлари бўйича келгуси 12 ой учун нархлар ўсиши бўйича бизнес вакилларининг инфляцион кутилмалари ўтган ойга нисбатан 1,1 фоиз бандга камайиб,14,1 фоизни ташкил этди, медиана қиймати эса 11,6 фоизни атрофида шаклланди.
Келгуси 12 ойда инфляция кўрсатгичи жорий даражада ёки ундан юқорироқ бўлишини кутаётган респондентларнинг улуши 52 фоиздан 47 фоизгача қисқарди. Август ойида тадбиркорлик субъектларининг кўпчилик қисми келгуси 12 ойда инфляцияни 9-12 фоиз атрофида бўлишини кутишмоқда. Шунингдек, сўнгги ойларда бир йилдан сўнг инфляция таргет доирасида бўлишини кутаётган бизнес вакилларининг улуши ортиб бормоқда.
Тадбиркорлар томонидан кейинги 12 ойда нархлар ошишига валюта курсининг ўзгариши (33 фоиз), ёқилғи маҳсулотлари ва транспорт хизматларининг нархлари қимматлашиши (29 фоиз) ҳамда иш ҳақи ва нафақаларнинг ошиши (24 фоиз) каби омиллар таъсир этиши мумкинлигини таъкидланди.
Шунингдек, импорт қилинадиган хориждан хомашё етказиб беришда узилишлар бўлишини ҳамда импорт қилишдаги тариф ва нотариф чекловларнинг мавжудлигини кутаётган тадбиркорларнинг улуши ўтган ойга нисбатан қисқарган. Бунда бизнес вакилларининг юқоридаги омиллар бўйича хавотирларининг камайишига янги таъминот занжирлари йўлга қўяётганлиги ҳамда иқтисодиётда рақобат муҳити яхшиланиб бораётганлиги билан изоҳланмоқда.
Эслатиб ўтамиз, аввалроқ Ўзбекистонда озиқ-овқат нархлари бўйича 2022 йилги инфляцион кутилмалар маълум қилинганди.
