Президентнинг «Саноат ишлаб чиқаришида хомашё узлуксизлигини таъминлаш бўйича қўшимча қулайликларни яратиш чора-тадбирлари тўғрисида»ги қарори қабул қилинди.

Қарор билан Президентнинг тадбиркорлар билан очиқ мулоқоти доирасида белгиланган вазифалар ижросини таъминлаш ҳамда «божхона ҳудудида қайта ишлаш» божхона режимини янада соддалаштириш, саноат корхоналарининг хомашё таъминотини яхшилаш мақсадида қуйидаги чоралар жорий этилади:

• хомашё ва ярим тайёр маҳсулотларга импорт божхона божи 2025 йил 1 январга қадар ноль ставкада қўлланилади;

• «божхона ҳудудида қайта ишлаш» божхона режими доирасида барча ташқи иқтисодий фаолият иштирокчиларига божхона тўловлари тўланишини таъминлаш талаби бекор қилинади;

• Ўзбекистон ҳудудига импорт қилишда божхона божи ва қўшилган қиймат солиғидан озод этиладиган, ўхшаши республикада ишлаб чиқарилмайдиган технологик асбоб-ускуналар рўйхатига технологик асбоб-ускуналар киритилади.

Шунингдек, 2023 йил 1 январдан бошлаб асбоб-ускуналар сотиб олиш (сотиш) бўйича шартномада уларни монтаж ва ишга тушириш-созлаш хизматлари, ходимларни ўқитиш хизматлари ва бошқа шу каби хизматлар қиймати алоҳида кўрсатилмаган ҳолларда норезидентнинг солиқ солинадиган даромадини ушбу хизматларнинг бозор қийматидан келиб чиқиб ҳисоблаш ҳамда мазкур турдаги шартномалар бўйича монтаж ва ишга тушириш-созлаш хизматлари, ходимларни ўқитиш хизматлари ва бошқа шу каби хизматлар кўрсатганлик учун норезидентнинг солиқ солинадиган даромадини шартнома объекти қийматининг 20 фоизига тенг деб ҳисоблашнинг амалдаги тартиби бекор қилинади.

Қайд этилишича, республика ҳудудига импорт қилишда божхона божи ва қўшилган қиймат солиғидан озод этиладиган технологик асбоб-ускуналар рўйхатига киритилган, бироқ ишлаб чиқарилганига уч йилдан кўп бўлган айрим технологик асбоб-ускуналар рўйхатини фақат божхона божидан озод қилиш шарти билан Ҳукумат комиссияси тасдиқлаши мумкин.

Инвестициялар ва ташқи савдо вазирлиги икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритиши белгиланди.