Meta компаниясига тегишли Facebook ва Instagram ижтимоий тармоқлари АҚШнинг собиқ президенти Дональд Трампнинг аккаунтларини блокдан чиқаради, деб хабар бермоқда компания.

«Яқин ҳафталарда биз жаноб Трампнинг Facebook ва Instagram’даги аккаунтларини блоклашни тугатамиз», дейилади баёнотда.

Маълум қилинишича, агар тақиқланган контент чоп этилса, у олиб ташланади ва Трамп қоидабузарлик даражасига қараб бир ойдан икки йилгача муддатга блокланади. Шунингдек, бўлажак президентлик сайловларининг қонунийлигига эътироз билдириш ва QAnon фитна назариясига оид хабарларни тарқатиш ҳолатларида ҳам чоралар кўрилади.

Аввалроқ АҚШ собиқ президентининг блокланган Twitter саҳифаси тиклангани ҳақида хабар берилганди. Ижтимоий тармоқнинг янги раҳбари Илон Маск ўз саҳифасида Трампни блокдан чиқариш-чиқармаслик бўйича сўровнома ўтказганди. Унда иштирокчиларнинг 52 фоизи собиқ президентнинг аккаунтини қайтаришни ёқлаб чиққан.