Фарғона вилояти ҳокими Ҳайрулло Бозоров Япониянинг Sansho компанияси президенти Aкaзaва Мaсaкини қабул қилди. Вилоят ҳокимлиги матбуот хизматининг хабар беришича, учрашувда Япония компанияси томонидан ҳудудда икки босқичда ташкил этиш режалаштирилаётган чиқиндини қайта ишлаш корхонаси лойиҳасини амалга ошириш жараёнлари муҳокама қилинган.

Маълум қилинишича, 100 фоиз тўғридан-тўғри Япония компанияси инвестицияси ҳисобига амалга ошириладиган, қиймати 10 миллион доллар бўлган мазкур лойиҳанинг 3 миллион долларлик биринчи босқичида экошаҳар ва унинг атрофидаги ҳудудлардаги чиқиндиларни ажратиш ва қайта ишлаш бўйича Япония технологиясига асосланган экологик тоза корхона ташкил этилади. Иккинчи босқичда эса чиқиндиларнинг қайта ишлаш мумкин бўлмаган қисмини ёқиш орқали электр энергия ишлаб чиқаришга асосланган корхона ташкил этиш режа қилинган.

Вилоят ҳокимлигига кўра, лойиҳа Фарғона тумани Саткак қишлоғи яқинида жойлашган марказий чиқиндихона ҳудудида амалга оширилади, шунингдек, экошаҳар ҳудудидаги чиқиндилар билан бирга чиқиндихона ҳудудидаги чиқиндиларни ҳам қўшиб қайта ишлаш ташкил этилади. Истиқболда чиқиндихона ҳудуди тўла тозаланиб, кичик саноат зонаси ташкил этиш режа қилинган.

Маълумот учун, лойиҳанинг биринчи босқичи 2023 йил сентябрь ойига қадар ишга туширилиши кўзда тутилган.

Аввалроқ Тошкент вилоятининг Оҳангарон ва Майдонтол маиший чиқинди полигонларида ҳосил бўладиган чиқинди газини қайта ишлаш ҳисобига электр энергиясини ишлаб чиқариш мажмуаси қурилиши ҳақида хабар берилганди. Ушбу лойиҳа Кореянинг Sejin G&E компанияси иштирокида 55 миллион доллар миқдоридаги тўғридан-тўғри инвестиция маблағлари ҳисобига амалга оширилади