Тошкент йўл инфратузилмасини яхшилашда Япония компаниясининг 3D камераларидан фойдаланилиши мумкин

«Рақамли Тошкент» доирасидаги лойиҳалар, шунингдек, йўл инфратузилмасини яхшилаш ҳамда ривожлантириш ишларида Япониянинг Teikoku компанияси томонидан ишлаб чиқарилган 3D юқори аниқликдаги камералардан фойдаланилиши мумкин

Тошкент шаҳар ҳокимининг ахборот технологияларини жорий этиш бўйича ўринбосари Алексей Хен Япониянинг рақамли технологиялар йўналишида фаолият юритувчи Teikoku компанияси вакиллари билан учрашди. Бу ҳақда пойтахт ҳокимлиги матбуот хизмати хабар берди.

Маълум қилинишича, учрашувда ўзаро ҳамкорликни йўлга қўйиш ва ривожлантириш масалалари муҳокама этилган.

Хусусан, Teikoku компанияси директори Юичи Нишизоно Тошкент шаҳрида рақамлаштириш йўналишида амалга оширилаётган лойиҳаларда иштирок этишга катта қизиқиш билдирди. Бу борада улар қўллаётган инновацион ечимлар ҳам фойдали бўлишини таъкидлаб, 3D юқори аниқликдаги камера (IMS3) имкониятларини намойиш этди ва уни амалда қўллаш юзасидан департамент мутахассисларини қизиқтирган саволларга жавоб берди.

Фото: Тошкент шаҳар ҳокимлиги матбуот хизмати

Шунингдек, компания мутахассислари намуна сифатида 20 километр йўлни 360 даража ўлчамда съёмка қилиб, йўллар ва объектлар, улардаги ташқи реклама воситалари, йўл белгиларининг аниқ ўлчамлари ҳамда йўлларнинг таъмирталаб нуқталарини билиш мумкинлигини кўрсатиб берган. Бундай хизмат «Рақамли Тошкент» доирасидаги лойиҳалар, шунингдек, йўл инфратузилмасини яхшилаш ҳамда ривожлантириш ишларида фойдали бўлишини таъкидлаб ўтди.

Аввалроқ Япония халқаро ҳамкорлик банки (JBIC) ва Mitsubishi UFJ банки ‘Ўзбектелеком’ АКга қарийб 19,3 миллиард иен (150 миллион АҚШ доллари) миқдорида молиявий ёрдам кўрсатиши ҳақида хабар берилганди. Маблағлар Ўзбекистонда ахборот-коммуникация инфратузилмасини ривожлантириш учун япон ускуналарини харид қилишга йўналтирилади

Koʻrishlar soni: 1 488