Meta сунъий интеллектни ўзбек тилига мослаштириш учун маҳаллий маълумотлар инфратузилмасини яратишни таклиф қилди
Шунингдек, Meta муҳандислари виртуал сессиялар ташкил этиш, моделларни ўргатиш, аниқлаш ва LLaMA’ни давлат веб-сайтларига интеграция қилиш бўйича қўллаб-қувватлашга тайёр.
Рақамли технологиялар вазири биринчи ўринбосари Олег Пекос Meta компаниясининг Марказий Осиё, Мўғулистон, Шри-Ланка ва Малдив ороллари бўйича вакили билан учрашув ўтказди.
Учрашувда вазир биринчи ўринбосари Пекос меҳмонларни жорий йилнинг 23–26 сентябр кунлари бўлиб ўтадиган «ICTWeek– 2025» халқаро тадбирига таклиф этди.
Вазир ўринбосари Р.Каримжонов мазкур тадбирнинг аҳамияти ва кўлами ҳақида сўз юритиб, Meta компаниясининг мазкур ҳафталикда ўз кўргазма стенди, панель тақдимотлари, шунингдек, сунъий инттеллект соҳасидаги мутахассисларини таклиф қилган ҳолда фаол иштирок этиши мумкинлигини маълум қилди.
Учрашувда, шунингдек, жорий йилнинг май ойида ишга туширилиши режалаштирилган 1M AI Prompters онлайн таълим платформаси ҳақида маълумот берди. Ушбу платформада Meta ўқув курсларини жойлаштириш таклифини билдирилди.
Шу билан бирга, Олег Пекос LLaMA моделини электрон ҳукумат тизимларига жорий этиш бўйича муваффақиятли тажриба – Адлия вазирлиги билан амалга оширилган пилот лойиҳа ҳақида сўзлади. Ушбу лойиҳа доирасида фойдаланувчиларга давлат хизматларидан фойдаланиш ва расмий ҳужжатлар тайёрлашда ёрдам берадиган LLaMA асосидаги чат-бот тақдим этилган.
Бундан ташқари, NVIDIA билан ҳамкорликда ўтказиладиган тадбир ва унда Ўзбекистондаги ихтисослашган университетлардан 300 нафар талабанинг иштирок этиши ҳақида маълумот берилди. Meta компанияси билан ҳам шунга ўхшаш тадбир ташкил этиш таклиф қилинди.
Meta вакили Сенура Абейвардена ўз нутқида сунъий интеллектни ўзбек тилига мослаштириш ва ўқитиш учун маҳаллий маълумотлар инфратузилмасини яратиш ташаббусини илгари сурди. У Тайван ва Қозоғистондаги муваффақиятли лойиҳаларни мисол сифатида келтирди. Шунингдек, у Meta муҳандислари билан виртуал сессиялар ташкил этиш, моделларни ўргатиш, аниқлаш, мутахассисларни очиқ кодли дастурлар билан ишлашга тайёрлаш ва LLaMA’ни давлат веб-сайтларига интеграция қилиш бўйича қўллаб-қувватлашга тайёр эканлигини маълум қилди.
Учрашувда томонлар бир қатор соҳаларда ҳамкорликни кенгайтириш ва чуқурлаштиришга тайёр эканликларини билдирдилар. Meta компанияси Ўзбекистонда рақамли трансформация жараёни ва сунъий инттеллектни ривожлантиришга бўлган интилишни юқори баҳолади.
