Япония Ўзбекистонда ахборот-коммуникацияни ривожлантиришга 150 млн доллар ажратади
Япония халқаро ҳамкорлик банки (JBIC) ва Mitsubishi UFJ банки ‘Ўзбектелеком’ АКга қарийб 19,3 миллиард иен (150 миллион АҚШ доллари) миқдорида молиявий ёрдам кўрсатади. Маблағлар Ўзбекистонда ахборот-коммуникация инфратузилмасини ривожлантириш учун япон ускуналарини харид қилишга йўналтирилади
Япония банклари «Ўзбектелеком» АКга молиявий кўмак беради. Бу ҳақда Япониянинг Nikkei Shimbun газетасида 27 январь куни мақола эълон қилинди.
«Япония халқаро ҳамкорлик банки (JBIC) ва Mitsubishi UFJ банки ‘Ўзбектелеком’ АКга қарийб 19,3 миллиард иен (150 миллион АҚШ доллари) миқдорида молиявий ёрдам кўрсатади. Маблағлар Ўзбекистонда ахборот-коммуникация инфратузилмасини ривожлантириш учун япон ускуналарини харид қилишга йўналтирилади. JBIC икки давлат ўртасидаги ҳукуматлараро алоқаларни мустаҳкамлаш ва молиялаштириш орқали Япония маҳсулотлари экспорти ҳажмини оширишга кўмаклашиш ниятида», дейилади мақолада.
Мақолада ёзилишича, ушбу лойиҳанинг оператори Япониянинг Toyota Tsusho савдо компанияси бўлиб, у орқали Япониянинг ахборот-коммуникация компаниялари ва ишлаб чиқарувчиларининг ускуналари Ўзбекистонга экспорт қилинади.
Қайд этилишича, «Ўзбектелеком» Ўзбекистонда дата-марказ яратиш ва ахборот-коммуникация тармоқларини ривожлантиришни режалаштирмоқда. Япония компаниялари ускуналар етказиб беришдан ташқари техник ёрдам ҳам кўрсатади.
«JBIC Ўзбекистон томонига умумий молиявий ресурсларнинг қарийб 60 фоизини тақдим этади. Mitsubishi UFJ банки томонидан молиялаштирилаётган маблағларнинг бир қисми хавфларни камайтириш учун NEXI давлат экспорт-кредит агентлиги томонидан суғурта қилинади», деб ёзган Nikkei Shimbun.
Эслатиб ўтамиз, Япония халқаро ҳамкорлик банки (JBIC) ҳамда MUFG Bank, Ltd банки билан «Ўзбектелеком» АК ўртасида республика телекоммуникация инфратузилмасини янада ривожлантиришни кўзда тутувчи лойиҳаларни молиялаштириш бўйича битимлар имзоланганди.
Мазкур лойиҳаларнинг амалга оширилиши натижасида
- халқаро пакетли коммутация марказларининг ўтказувчанлик қобилияти 1,3 баробарга оширилади;
- республика телекоммуникация тармоғининг ўтказувчанлик қобилияти 1,15 баробарга оширилади;
- Тошкент, Бухоро ва Фарғона вилоятларида янги Дата марказлари ташкил этилади.
Лойиҳани амалга оширишда NEXI, Toyota Tsusho Corporation, Internet Initiative Japan, NEC ва NTT Communications каби етакчи компаниялар иштирок этади.