Тошкентдан тўртта вилоятга экспресс контейнер поездлари қатновлари йўлга қўйилади
Тошкентдан Бухоро, Қашқадарё, Навоий ва Хоразм вилоятларига экспресс поездлар ҳаракати йўлга қўйилади
Тошкентдан Бухоро, Қашқадарё, Навоий ва Хоразм вилоятларига экспресс поездлар ҳаракати йўлга қўйилади. Бу ҳақда «Ўзтемирйўлконтейнер» АЖ матбуот хизмати Kommers.uz’га хабар берди.
Маълум қилинишича, пойтахтдан экспресс контейнер поезд ҳаракати дастлаб 2022 йил 4 июндан Фарғона водийси вилоятлари (Андижон, Фарғона ва Наманган)га йўлга қўйилган. Кейинчалик эса 2022 йилнинг сентябрь ойида Самарқанд вилоятига ҳам ушбу поезд қатнай бошлади.
«Ўзтемирйўлконтейнер»нинг маркетинг ва халқаро муносабатлар бўлими бошлиғи ўринбосари Зойир Мирзаевнинг таъкидлашича, экспресс контейнер поездлар ҳаракати ҳафтасига 3 марта амалга оширилади.
«Ҳозирда Тошкентдан Андижон, Фарғона, Наманган ҳамда Самарқанд вилоятларига экспресс контейнер поездлар ҳаракати ҳафтасига 3 марта амалга оширилмоқда. Йўл кира нархлари — 40 футлик контейнерларга 2,015 миллион сўм, 20 футлик контейнерларга эса 1,570 миллион сўм. Бунинг афзал жиҳатларидан бири машинада юк жўнатишдан кўра арзонлигидадир. Иккинчи томондан эса агар юкларингизни экспресс контейнер поездларида ташисангиз, терминалда сақланган юкка ҳар кунлик учун тўлов қилинмайди. Шунингдек, экспресс контейнер поездда юкларни юбориш вақти тежалади», — деди Мирзаев.
Унга кўра, Тошкент шаҳридан контейнерларни Фарғона, Наманган, Андижон вилоятларига 10 соатда, Самарқанд вилоятига 6 соатда етказиб бериш имконияти мавжуд.
«Келажакда Бухоро, Қашқадарё, Навоий ва Хоразм вилоятларига ҳам эксперсс контейнер поездлари қатновларини йўлга қўйишни мақсад қилганмиз», — деди «Ўзтемирйўлконтейнер» АЖ масъули.
