Рақобат қўмитаси БААда рўйхатдан ўтган Tapuz Limited компаниясининг OLX Classifieds устав капиталидаги 100 фоиз улушни сотиб олиши бўйича иқтисодий концентрация битимини кўриб чиқиб, қатор мажбурий шартлар билан унга олдиндан розилик берди.

Қўмита маълумотига кўра, Tapuz Limited инвестиция фаолияти билан шуғулланувчи холдинг компания ҳисобланади. OLX Classifieds эса OLX савдо белгиси остида онлайн эълон ва реклама хизматларини кўрсатувчи рақамли платформа операторидир.

Таҳлиллар давомида Tapuz Limited’нинг асосий акциядори бўлган TBC Bank Group PLC Ўзбекистонда TBC Bank Uzbekistan рақамли тижорат банки ҳамда Payme тўлов хизматига билвосита эгалик қилиши инобатга олинган. Шунингдек, Payme ва OLX Classifieds рақамли платформалар соҳасида устун мавқега эга корхоналар рўйхатига киритилган.

Шу билан бирга, қўмита Tapuz Limited Ўзбекистондаги бошқа онлайн реклама платформалари устав фондларида улушга эга эмаслигини аниқлаган.

Рақобат қўмитасининг Махсус комиссияси таҳлиллари натижасида битим рақобат муҳитини сақлаш ва истеъмолчилар манфаатларини ҳимоя қилишга қаратилган мажбурий талаблар асосида маъқулланди.

Хусусан, янги эгага қуйидаги талаблар қўйилди:

• TBC Bank Group назоратидаги рақамли платформалар орқали OLX фойдаланувчилари учун хизмат кўрсатиш шартларига бир томонлама ва асоссиз таъсир кўрсатмаслик;
• OLX орқали йиғилган ёки қайта ишланган маълумотлардан рақобатни чеклаш мақсадида фойдаланмаслик, жумладан TBC Bank ва Payme билан рақобатлашувчи компаниялар мижозларига оид шахсий ёки тижорат маълумотларини ошкор қилмаслик;
• OLX хизматлари учун тўловларда фойдаланувчиларни фақат Payme ёки TBC Bank иловаларидан фойдаланишга мажбурламаслик ҳамда бошқа тўлов хизматлари учун тенг шароит яратиш;
• Рақобат тўғрисидаги қонунчилик ва иқтисодий концентрациялар бўйича белгиланган талабларга тўлиқ риоя қилиш.

Қўмита қарорига кўра, битим айнан шу шартлар бажарилиши мажбурий бўлган ҳолда маъқулланган.

2025 йил август ойида Грузия ва Ўзбекистондаги рақамли банкинг экотизими оператори TBC Bank Group мамлакатдаги энг йирик онлайн эълонлар платформаси бўлган OLX Uzbekistan’нинг назорат пакетини сотиб олганини эълон қилди. Битим учун TBC Titan Investments халқаро инвестиция холдинг компанияси билан қўшма корхона ташкил этди: OLX Uzbekistan акцияларининг 100 фоизи қўшма корхонага ўтиши режалаштирилган эди, бунда TBC 50% плюс битта акцияга, Titan Investments эса қолган улушга эга бўлади. Сотувчи Prosus таркибига кирувчи OLX Group эди.

TBC ушбу битимни Ўзбекистонда сўнгги 30 йил ичида бозордаги энг йирик бирлашиш ва қўшиб олишлардан бири деб атади, унинг суммаси ошкор этилмади. Банк маълумотларига кўра, ўша пайтда OLX ўзбек сайтлари орасида ташрифлар сони бўйича олтинчи ўринни эгаллаган, ойига 5,4 миллион фаол фойдаланувчи ва 2,2 миллион долзарб эълонларга эга бўлиб, мамлакатнинг фаол интернет аудиториясининг 20 фоиздан ортиғини қамраб олган. Банк OLX ўз бренди остида ишлашда давом этишини, бироқ келажакда 21 миллиондан ортиқ фойдаланувчини бирлаштирган TBC Uzbekistan экотизимига интеграция қилинишини маълум қилди.