Ijtimoiy tarmoqlarda hisoblagichlar elektr quvvatini ortiqcha hisoblayotgani va bu qoʻshimcha xarajatlarni keltirib chiqarayotgani yuzasidan isteʼmolchilarning murojaatlari tarqaldi. Raqobatni rivojlantirish va isteʼmolchilar huquqlarini himoya qilish qoʻmitasi holat yuzasidan munosabat bildirdi.

Maʼlum qilinishicha, joylarga chiqqan holda muammolarni oʻrganish va manzilli hal etish boʻyicha qoʻmita tomonidan tezkor ishchi guruh tuzilgan. Ishchi guruh tarkibidan Raqobat qoʻmitasidan tashqari “Oʻzenergoinspeksiya”, Texnik jihatdan tartibga solish agentligi hamda “Toshkent shahar elektr tarmoqlari” MCHJ vakillari jalb qilingan.

Oʻrganish davomida aniqlangan kamchiliklarni bartaraf etish boʻyicha qonuniy choralar koʻrilishi bildirildi.

Eslatib oʻtamiz, avvalroq Raqobat qoʻmitasi madaniyat vaziri Ozodbek Nazarbekovning kiyim doʻkonini reklama qilgani yuzasidan oʻrganish olib borayotganini maʼlum qilgandi. Shuningdek, qoʻmita tomonidan “Lukoil” kompaniyasiga nisbatan birjada narxlarni sunʼiy oshirish alomati boʻyicha ish ochildi.