17-iyul kuni bir troya unsiya oltinning narxi 2 483 dollargacha chiqib, tarixiy rekordni yangiladi. 18-iyul holatiga koʻra, oltinning global narxi troya unsiyasi uchun 2 465 dollarga teng bo‘lib turibdi.

Oʻzbekistonda ham oltin quymalar narxi yangi rekord qayd etdi. Markaziy bank tomonidan 18-iyul kuni uchun chiqarilgan narxlarga ko’ra, oltin quymalarning 1 grammi uchun narxi 1 mln 33 ming 700 soʻmgacha yuqoriladi.

Regulyator tomonidan oltin quymalari bo‘yicha taqdim qilingan ma’lumotlarga ko‘ra:

• 5 gramm o‘lchovli oltin quyma narxi – 5 mln 169 ming so‘m;
• 10 gramm oltin quyma narxi – 10 mln 337 ming soʻm;
• 20 gramm oltin quyma narxi – 20 mln 675 ming so‘m;
• 50 gramm oltin quyma narxi – 51 mln 687 ming so‘mni tashkil qiladi.

O’zbekistonda oltin narxi ilk bor 17-aprel kuni bir grammi uchun 1 mln soʻmdan oshgandi. Shundan keyin narx nisbatan barqarorlikni saqlab, 1 mln soʻm atrofida shakllanib kelayotgandi.

Oltin narxining ko’tarilishiga investorlarning AQSH Federal zaxira tizimining (Fed) foiz stavkalarini sezilarli pasaytirishi boʻyicha kutilmalari kuchaygani asosiy sabab boʻlayotgani aytilmoqda. Bundan tashqari, Xitoy boshchiligida bir necha davlatlarning Markaziy banklari zaxiralarni diversifikatsiya qilish maqsadida oltin sotib olishni ko’paytirgan.

Eslatib o’tamiz, oltin quymalarini tijorat banklaridan xarid qilish mumkin. Markaziy bank sayti orqali banklarning qaysi filiallarida quymalar mavjudligini ko’rish imkoniyati mavjud.