Janubiy Koreya Jizzaxda chiqindini qayta ishlash zavodi quradi
Jizzax viloyatida barqaror chiqindilarni qayta ishlash zavodini qurish boʻyicha Janubiy Koreya korporatsiyasi bilan umumiy qiymati 6,2 mln dollarga teng boʻlgan 4 yillik grant loyiha bitimi imzolandi.
Ekologiya, atrof-muhitni muhofaza qilish va iqlim o‘zgarishi vaziri oʻrinbosari Iskandar Qutbiddinov boshchiligidagi delegatsiya Janubiy Koreyaning Seul shahrida bo‘ldi va bir qancha kompaniyalar bilan chiqindilarni qayta ishlash sohasida hamkorlik qilish borasida muzokaralar olib bordi, deb xabar bermoqda Ekologiya vazirligi matbuot xizmati.
Shuningdek, chiqindilarni yoqish orqali “yashil” energiya oladigan korxonalar faoliyati bilan yaqindan tanishilgan. Qolaversa, Koreya eksport va import banki vakillari bilan muzokaralar olib borilgan.
Koreya Atrof-muhit vazirligi huzuridagi Koreya atrof-muhit korporatsiyasi (K-eco) raisi B. An bilan uchrashuv davomida o‘zaro hamkorlik aloqalarini mustahkamlash va ekologik xavfsizlik borasida tajriba almashish boʻyicha kelishuvga erishilgan. Yakunda Jizzax viloyatida barqaror chiqindilarni qayta ishlash zavodini qurish boʻyicha umumiy qiymati 6,2 mln dollarga teng boʻlgan 4 yillik grant loyiha bitimi imzolandi.
Maʼlumot uchun, loyiha doirasida poligonni rekultivatsiya qilish, 300 000 m3 chiqindini bir joyga toʻplash, tuproq bilan qoplash hamda chiqindixona gazini yigʻish va piroliz usuli orqali yoqish, elektr energiya ishlab chiqarish uskunalarini (elektrogenerator) oʻrnatish belgilangan.
Eslatib o‘tamiz, Janubiy Koreya bilan hamkorlikda O‘zbekistonning ikki viloyatida quruqlik porti qurilishi bo‘yicha texnik-iqtisodiy asoslash (TIA) ishlab chiqilishi ma’lum qilingandi. Shu yilning 9-avgustida boshlangan loyiha 13 oyga mo‘ljallangan bo‘lib, 2025-yil 12-sentyabrda yakunlanishi aytilgandi.