Afg‘onistonda o‘zbek haydovchilaridan undiriladigan yig‘im va to‘lovlar miqdori kamaytirilmoqda
O‘zbek haydovchilaridan mamlakat hududida undiriladigan yig‘imlar 99 dollarga (6,5 ming afg‘oni) kamaytirildi. Amudaryo ko‘prigidan o‘tish uchun avval undiriladigan 182 dollar (12 ming afg‘oni) yig‘im endilikda 106 dollar (7 ming afg‘oni) etib belgiladi.
Afg‘oniston bilan olib borilgan muzokaralar natijalariga ko‘ra o‘zbek haydovchilaridan mamlakat hududida undiriladigan yig‘imlar 6 500 afg‘oni miqdorida (taxminan 99 AQSh dollari) kamaytirildi, deb xabar bermoqda O‘zbekiston Transport vazirligi matbuot xizmati.
Qayd etilishicha, Amudaryo ko‘prigidan o‘tish uchun avval 12 000 afg‘oni (taxminan 182 AQSh dollari) miqdorida undiriladigan yig‘imni joriy yil 28-sentabrdan 7 000 afg‘oni (taxminan 106 AQSh dollari) etib belgilandi.
Afg‘onistonga yuk avtotransport vositasini kirishi uchun avval 5 000 afg‘oni (taxminan 76 AQSh dollari) miqdorida undiriladigan yig‘im esa 3 500 afg‘oni (taxminan 53 AQSh dollari) etib belgiladi.
“Bugungi kunda Transport vazirligi tomonidan Transafg‘on multimodal transport yo‘lagi orqali yuk tashuvlariga qulay sharoitlar yaratish, undiriladigan yig‘imlar miqdorini optimallashtirish bo‘yicha ishlar davom ettirilmoqda”, deyiladi xabarda.
